ഭുവനേശ്വർ: ഒഡിഷയിൽ ആരോഗ്യ-കുടുംബക്ഷേമ വകുപ്പിന്റെ ചുമതല ധനമന്ത്രി നിരഞ്ജൻ പൂജാരിക്ക് നൽകി. കഴിഞ്ഞ ദിവസം മന്ത്രി നബ കിഷോർ ദാസ് വെടിയേറ്റ് മരിച്ചതിനെ തുടർന്നാണ് അദ്ദേഹം വഹിച്ചിരുന്ന വകുപ്പുകളുടെ ചുമതല മുഖ്യമന്ത്രി നവീൻ പട്നായിക്ക് നിരഞ്ജൻ പൂജാരിക്ക് നൽകിയത്. നിയമനം ഗവർണർ പ്രൊഫ. ഗണേഷി ലാൽ അംഗീകരിച്ചതായി മുഖ്യമന്ത്രിയുടെ ഓഫീസ് അറിയിച്ചു. ബി.ജെ.ഡി എം.എൽ.എയായി അഞ്ചാം തവണയും തിരഞ്ഞെടുക്കപ്പെട്ട നി​രഞ്ജന് പാർലമെന്ററി കാര്യവകുപ്പിന്റെ കൂടി ചുമതലയുണ്ട്.

ഞായറാഴ്ച പൊതുപരിപാടിയിൽ പങ്കെടുക്കുന്നതിനിടെ എ.എസ്.ഐ ഗോപാൽദാസിന്റെ വെടിയേറ്റാണ് മന്ത്രി നബ കിഷോർ ദാസ് മരിച്ചത്. ഇന്നലെ ബി.ജെ.ഡി പാർട്ടി ഓഫീസിലെത്തിച്ച മൃതദേഹത്തിൽ നൂറു കണക്കിനാളുകൾ അന്ത്യോപചാരമർപ്പിച്ചു. സംസ്കാരച്ചടങ്ങുകൾ സംസ്ഥാന ബഹുമതികളോടെ സ്വദേശമായ ജാർസുഗുഡയിൽ നടക്കും. ആദരസൂചകമായി മൂന്നു ദിവസത്തെ ഔദ്യോഗിക ദുഃഖാചരണം നടത്തും.