ഡേവിസ് കപ്പ്: പാകിസ്ഥാനെ തകർത്ത് ഇന്ത്യൻ കുതിപ്പ്

ഇസ്ലാമബാദ്: അറുപത് വ‌ർഷത്തെ ഇടവേളയ്ക്ക് ശേഷം പാകിസ്ഥാനിൽ ഡേവിസ് കപ്പ് ടെന്നിസ് മത്സരത്തിനിറങ്ങിയ ഇന്ത്യൻ ടീം ഗംഭീരവിജയം സ്വന്തമാക്കി വേൾഡ് ഗ്രൂപ്പ് 1ലേക്ക് യോഗ്യത നേടി. വേൾഡ് ഗ്രൂപ്പ് 1 പ്ലേ ഓഫിൽ കളിച്ച നാല്‌ മത്സരങ്ങളും ജയിച്ച് 4-0ത്തിന് പാകിസ്ഥാനെ തൂത്തുവാരിയാണ് ഇന്ത്യ മടങ്ങുന്നത്. പാകിസ്ഥാനെതിരെ ഡേവിസ് കപ്പിൽ ഇതുവരെ തോറ്റിട്ടില്ലെന്ന റെക്കാഡ് നിലനിറുത്താനും ഇന്ത്യയ്ക്കായി.

ഇസ്ലാമബാദിൽ അതീവ സുരക്ഷയിൽ ഇന്നലെ ആദ്യം നടന്ന ഡബിൾസ് പോരാട്ടത്തിൽ ഇന്ത്യയുടെ യുകി ഭാംഭ്രി - സാകേത് മെയ്‌നേനി സഖ്യം പാകിസ്ഥാന്റെ അഖീൽ ഖാൻ- മുസ്വാമിഷ മുർത്താസ സഖ്യത്തെ അനായാസം നേരിട്ടുള്ള സെറ്റുകളിൽ 6-3, 6-4ന് കീഴടക്കിയപ്പോൾ തന്നെ ഇന്ത്യ വേൾഡ് ഗ്രൂപ്പ് 1ലേക്ക് യോഗ്യത ഉറപ്പിച്ചിരുന്നു. തുടർന്ന് നടന്ന സിംഗിൾസിൽ നികി പൂനാച്ച നേരിട്ടുള്ള സെറ്റുകളിൽ 6-3,6-4ന് പാക് യുവതാരം മുഹമ്മദ് ഷൊയിബിനെ കീഴടക്കുകയായിരുന്നു. തുടർന്ന് നടക്കേണ്ട അഞ്ചാം മത്സരം അപ്രസക്തമായി. ആദ്യ ദിനം നടന്ന സിംഗിൾസ് മത്സരങ്ങളിൽ ഇന്ത്യയുടെ രാംകുമാർ രാമനാഥനും ബാലാജിയും ജയം നേടിയിരുന്നു.

ഇന്ത്യ യോഗ്യത നേടിയ വേൾഡ് ഗ്രൂപ്പ് 1 മത്സരങ്ങൾ സെപ്തംബറിൽ നടക്കും, പാകിസ്ഥാൻ വേൾഡ്ഗ്രൂപ്പ് 2ൽ തുടരും ഇവരുടെ മത്സരങ്ങളും സെപ്തംബറിലാണ്.

8-0

ഡേവിസ് കപ്പിൽ പാകിസ്ഥാനെതിരെ ഇതുവരെ ഇന്ത്യതോറ്റിട്ടില്ല.

1964ലാണ് ഇതിന് മുമ്പ് ഇന്ത്യ പാകിസ്ഥാനിൽ ഡേവിസ് കപ്പ് മത്സരം കളിച്ചത്.