60 മത്സരങ്ങളിൽ 31 എണ്ണം ബാക്കിയാക്കിയാണ് ഐ.പി.എൽ നിറുത്തിവച്ചിരിക്കുന്നത്.ശേഷിക്കുന്ന മത്സരങ്ങൾ എപ്പോൾ നടത്താനാകും എന്ന് ചർച്ചകൾ നടക്കുകയാണ്. ഒരാഴ്ചത്തേയ്ക്ക് നിറുത്തിവയ്ക്കുന്നു എന്നാണ് ഇന്നലെ ആദ്യം വന്ന റിപ്പോർട്ടുകൾ. തുടർന്ന് എല്ലാ ടീമുകളെയും മുംബയ്‌യിൽ ഒരുമിച്ചുകൂട്ടി ഒറ്റവേദിയിലാക്കി ഈ എഡിഷൻ പൂർത്തിയാക്കുമെന്ന് അഭ്യൂഹങ്ങൾ പരന്നു. എന്നാൽ താരങ്ങൾക്ക് വീടുകളിലേക്ക് മടങ്ങാമെന്ന് ബി.സി.സി.ഐ അറിയിച്ചതോടെ ഉടനെയെങ്ങും ടൂർണമെന്റ് പുനരാരംഭിക്കുകയില്ല എന്ന് ഉറപ്പായി.

മേയ് 30നാണ് ഈ സീസൺ ഐ.പി.എല്ലിന്റെ ഫൈനൽ നിശ്ചയിച്ചിരുന്നത്. ഇത് കഴിഞ്ഞാൽ ലോക ടെസ്റ്റ് ചാമ്പ്യൻഷിപ്പിന്റെ ഫൈനലിനും തുടർന്ന് ഇംഗ്ളണ്ടുമായുള്ള പരമ്പരകൾക്കുമായി ഇന്ത്യൻ ടീം പുറപ്പെടും. ഒക്ടോബറിൽ ഇന്ത്യയിൽ ട്വന്റി-20 ലോകകപ്പും നിശ്ചയിച്ചിരിക്കുകയാണ്. കഴിഞ്ഞ സീസണിൽ ഐ.പി.എൽ നടത്താനായി ആസ്ട്രേലിയിൽ നടക്കേണ്ടിയിരുന്ന ലോകകപ്പ് 2022ലേക്ക് മാറ്റിയിരുന്നു.