അഹമ്മദാബാദ്: റോളർ സ്കേറ്റിംഗിലെ മിന്നും പ്രകടനത്തിന്റ പിൻബലത്തിലാണ് ദേശീയ ഗെയിംസിൽ ഇന്നലെ കേരളം തലയുയർത്തി നിന്നത്. പുരുഷൻമാരുടെ ആർട്ടിസ്റ്റിക് സിംഗിൾ ഫ്രീ സ്കേറ്റിംഗ് കോഡിൽ പത്തനംതിട്ടക്കാരൻ അഭിജിത്ത് അമൽ രാജും വനിതകളുടെ സ്കേറ്റ് ബോർഡിംഗിൽ തിരുവനന്തപുരം സ്വദേശി വിദ്യാ ദാസും സ്വർണം നേടിയപ്പോൾ സ്കേറ്റ് ബോർഡിംഗിൽ വിനീഷ് വെങ്കലവും സ്വന്തമാക്കുകയായിരുന്നു.
ലോക ജൂനിയർ ചാമ്പ്യനായ അഭിജിത്ത് 146.9 പോയിന്റ് നേടിയാണ് ദേശീയ ഗെയിംസിൽ സ്വർണം നേടിയത്. മികച്ച പ്രകടനവുമായി സ്വർണമണിഞ്ഞ വിദ്യ തിരുവനന്തപുരം വെങ്ങാനൂർ ഹയർസെക്കൻഡറി സ്കൂളിലെ ഒമ്പതാം ക്ലാസ് വിദ്യാർത്ഥിയാണ്.ഏറെ നാളുകൾക്ക് ശേഷമാണ് ദേശീയ ഗെയിംസിൽ റോളർ സ്കേറ്റിംഗ് ഉൾപ്പെടുത്തുന്നത്. ദേശീയ ഗെയിംസിൽ റോളർ സ്കേറ്റിംഗിൽ കേരളം ആദ്യമായാണ് മെഡലുകൾ നേടുന്നത്.
ട്രിപ്പിൾ ജമ്പിലെ അരുണിന്റെ വെള്ളിയും ഫെൻസിംഗിലെ ജോസ്നയുടെ വെങ്കല നേട്ടവും കൂടിയായപ്പോൾ ദേശീയ ഗെയിംസിൽ മികച്ച തുടക്കം നേടാൻ കേരളത്തിനായി.
ആദ്യ മെഡൽ ജോസ്നയിലൂടെ
ഇത്തവണത്തെ ദേശീയ ഗെയിംസിൽ കേരളം ആദ്യ മെഡൽ സ്വന്തമാക്കിയത് വനിതകളുടെ ഫെൻസിംഗിൽ സാബർ വിഭാഗത്തിൽ ജോസ്ന ക്രിസ്റ്റി ജോസ് നേടിയ വെങ്കലത്തിലൂടെയായിരുന്നു. മികച്ച പ്രകടനം നടത്തി മുന്നേറുകയായിരുന്ന ജോസ്ന സെമിയിൽ കോമൺവെൽത്ത് ഗെയിംസിലെ സ്വർണ മെഡൽ ജേതാവും ഒളിമ്പ്യനുമായ തമിഴ്നാടിന്റെ ഭവാനി ദേവിയോട് തോറ്രതോടെയാണ് (5-15)സുവർണ സ്വപ്നം വെങ്കലത്തിൽ എത്തിയത്. ഭവാനി തന്നെയാണ് ഇവിടെ സ്വർണം നേടിയത്.
പ്രീ ക്വാർട്ടറിൽ പഞ്ചാബിന്റെ കോമൾ പ്രീതിനെ 15-0ത്തിനും ക്വാർട്ടറിൽ തമിഴ്നാടിന്റെ ബെനിക്വബയെ 15-7നും വീഴ്ത്തിയിരുന്നു ജോസ്ന.
വെള്ളിത്തിളക്കത്തിൽ അരുൺ
പുരുഷൻമാരുടെ ട്രിപ്പിൾ ജമ്പിൽ 16.08 മീറ്റർ ചാടിയാണ് കേരളത്തിനായി അരുൺ വെള്ളി സ്വന്തമാക്കിയത്. അത്ലറ്രിക്സിൽ ഇത്തവണ കേരളത്തിന് ലഭിക്കുന്ന ആദ്യ മെഡലാണിത്. 16.68 മീറ്രർ ചാടിയ തമിഴ്നാടിന്റെ പ്രവീൺ ചിത്രവേലാണ് റെക്കാഡോടെ സ്വർണം സ്വന്തമാക്കിയത്. മലയാളിതാരം രഞ്ജിത്ത് മഹേശ്വരിയുടെ പേരിലുണ്ടായിരുന്ന 16.66 മീറ്ററിന്റെ ദേശീയ റെക്കാഡാണ് ചിത്രവേൽ പഴങ്കഥയാക്കിയത്. പഞ്ചാബിന്റെ അർപീന്ദർ സിംഗിനാണ് വെങ്കലം.
ചാനുവിന് സ്വർണം
ഒളിമ്പിക് വെള്ളി മെഡൽ ജേതാവും കോമൺവെൽത്തിലെ സ്വർണ നേട്ടക്കാരിയുമായ മീരാബായി ചാനു ദേശീയ ഗെയിംസിലും ചാമ്പ്യനായി. മണിപ്പൂരിനായി മത്സരിച്ച ചാനു ആകെ 191 കിലോ ഉയർത്തിയാണ് സ്വർണം സ്വന്തമാക്കിയത്. 2015ൽ കേരളത്തിൽ നടന്ന ഗെയിംസിലും ചാനു സ്വർണം നേടിയിരുന്നു.
അത്ലറ്റിക്സിൽ ഇന്നലെ 9 ദേശീയ റെക്കാഡുകളാണ് പിറന്നത്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |