ടെഹ്റാൻ: പാകിസ്ഥാനുള്ളിൽ കടന്ന് ജെയ്ഷ് അൽ - അദ്ൽ ഭീകരഗ്രൂപ്പിന്റെ കമാൻഡർ ഇസ്മയിൽ ഷബാക്ഷിനെയും ഏതാനും അനുയായികളെയും ഇറാൻ സൈന്യം വധിച്ചെന്ന് റിപ്പോർട്ട്. ഇറാൻ മാദ്ധ്യമങ്ങളാണ് വാർത്ത പുറത്തുവിട്ടത്. പാക് അധികൃതർ പ്രതികരിച്ചിട്ടില്ല.
കഴിഞ്ഞ മാസം പാകിസ്ഥാനിലെ ബലൂചിസ്ഥാനിൽ ജെയ്ഷ് അൽ - അദ്ൽ ഭീകരകേന്ദ്രങ്ങളിൽ ഇറാൻ നടത്തിയ മിസൈൽ ആക്രമണത്തിൽ മൂന്നുപേർ കൊല്ലപ്പെട്ടിരുന്നു. ഇതിനിടെ ഇറാനിലെ സിസ്താൻ ബലൂചിസ്ഥാൻ പ്രവിശ്യയിലെ ഭീകര താവളങ്ങളിൽ പാകിസ്ഥാൻ പ്രത്യാക്രമണം നടത്തുകയും പത്ത് പേർ കൊല്ലപ്പെടുകയും ചെയ്തു. ആക്രമണങ്ങളുടെ പശ്ചാത്തലത്തിൽ വഷളായ ഇരുരാജ്യങ്ങളും തമ്മിലെ നയതന്ത്ര ബന്ധം പിന്നീട് വിദേശകാര്യ മന്ത്രിമാർ നടത്തിയ ചർച്ചയിലൂടെയാണ് പുനസ്ഥാപിച്ചത്.
2012ൽ രൂപംകൊണ്ട ജെയ്ഷ് അൽ അദ്ലിന്റെ ആസ്ഥാനം സിസ്താൻ ബലൂചിസ്ഥാൻ പ്രവിശ്യയാണ്. സിസ്താൻ ബലൂചിസ്ഥാൻ പ്രവിശ്യയുടെ സ്വാതന്ത്ര്യം ലക്ഷ്യമിടുന്ന ഇവർ ഇറാനിലും പാകിസ്ഥാനിലെ സുരക്ഷാ ഉദ്യോഗസ്ഥർക്കുമെതിരെ നിരവധി ആക്രമണങ്ങൾ നടത്തിയിട്ടുണ്ട്. ഡിസംബറിൽ സിസ്താൻ ബലൂചിസ്ഥാനിലെ പൊലീസ് സ്റ്റേഷനിൽ ഇവർ നടത്തിയ ആക്രമണത്തിൽ 11 ഉദ്യോഗസ്ഥർ കൊല്ലപ്പെട്ടിരുന്നു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |