കാബൂൾ: അഫ്ഗാനിസ്ഥാനിൽ നിന്ന് അവസാന സംഘം സൈനികരേയും പിൻവലിക്കാൻ നടപടികൾ ഇന്നലെ ഔദ്യോഗികമായി ആരംഭിച്ച് അമേരിക്ക. താലിബാനുമായി കഴിഞ്ഞ വർഷം ട്രംപ്​ ഭരണകൂടം എത്തിയ ധാരണയുടെ അടിസ്ഥാനത്തിലാണിത്. അതേസമയം, സേനാ പിന്മാറ്റം പുരോഗമിച്ചുകൊണ്ടിരിക്കുകയാണെന്നും ഇന്നലത്തെ നടപടി അതിന്റെ തുടർച്ച മാത്രമാണെന്നും യു.എസ് ഉദ്യോഗസ്ഥർ വ്യക്​തമാക്കി. മെയ്​ ഒന്നിന്​ സൈനിക പിൻമാറ്റം ആരംഭിക്കുമെന്ന്​ അമേരിക്കൻ പ്രസിഡന്റ് ജോ ബൈഡൻ നേരത്തെ വ്യക്തമാക്കിയിരുന്നു. നാറ്റോ സഖ്യകക്ഷികളും തങ്ങളുടെ സൈന്യത്തെ വ്യാഴാഴ്​ച മുതൽ പിൻവലിക്കാൻ ആരംഭിച്ചിരുന്നു. 2001ലെ ഭീകരാക്രമണത്തിന്‍റെ 20-ാം വാർഷികമായ സെപ്തംബർ 11നകം മുഴുവൻ സൈനികരെയും പിൻവലിക്കാനാണ് അമേരിക്കയുടെ​ തീരുമാനം.ഇത്​ പൂർത്തിയാകുന്നതോടെ അഫ്​ഗാനിസ്ഥാനിലെ അമേരിക്കൻ എംബസിക്ക്​ മാത്രമാകും സുരക്ഷ സൈനികർ കാവലുണ്ടാകുക.

അതേസമയം, വിദേശ സൈന്യം പിന്മാറിയാലും രാജ്യത്തെ കലാപകാരികളെ ഉന്മൂലനം ചെയ്യാൻ അഫ്ഗാൻ സേന പ്രാപ്​തരാണെന്ന്​ പ്രസിഡന്റ് അഷ്​റഫ്​ ഘാനി കഴിഞ്ഞദിവസം വ്യക്​തമാക്കിയിരുന്നു. വിദേശികളോട് യുദ്ധം ചെയ്യാനുള്ള ഭീകര സംഘടനയായ താലിബാന്റെ കാരണം ഇപ്പോൾ അവസാനിച്ചെന്നും അദ്ദേഹം പറഞ്ഞു. അതേസമയം, അഫ്​ഗാനിൽ പൂർണ സമാധാനം ലക്ഷ്യമിട്ട്​ അമേരിക്കയുടെ നേതൃത്വത്തിൽ തുർക്കിയിൽ നടക്കുന്ന ചർച്ചയിൽ വിദേശ സൈനികരുടെ പൂർണ പിന്മാറ്റമില്ലാതെ പ​ങ്കെടുക്കില്ലെന്ന്​ താലിബാൻ നേരത്തെ വ്യക്​തമാക്കിയിരുന്നു.

 അഫ്ഗാനിൽ നിലവിൽ 2,500 അമേരിക്കൻ സൈനികരുണ്ട്​

 7,000 വിദേശ സൈനികർ

 20 വർഷത്തിനിടെ എട്ട് ലക്ഷം സൈനികർ സേവനമനുഷ്ഠിച്ചു

 2,300 പേർ കൊല്ലപ്പെട്ടു

 20,000​ പേർക്ക് പരിക്കേറ്റു

 അരലക്ഷം അഫ്​ഗാൻ പൗരന്മാരും കൊല്ലപ്പെട്ടു

 അഫ്ഗാനിൽ ഭീകരാക്രമണം : 21 മരണം

അഫ്ഗാനിൽ നിന്ന് അമേരിക്കയുടെ സൈനിക പിന്മാറ്റം പുരോഗമിക്കുന്നതിനിടെ ലോഗർ പ്രവിശ്യയുടെ തലസ്ഥാനമായ പുൾ -ഇ -ആലാമിലെ ഗസ്റ്റ് ഹൗസിലുണ്ടായ കാർ ബോംബാക്രമണത്തിൽ 21 പേർ മരിച്ചു. 100 പേർക്ക് പരിക്കേറ്റു. വെള്ളിയാഴ്ച രാത്രി നടന്ന ആക്രമണത്തിന്റെ ഉത്തരവാദിത്വം ആരും ഏറ്റെടുത്തിട്ടില്ല. ബോംബ് സ്‌ഫോടനത്തിന്​ സൈനികരുടെ പിൻമാറ്റവുമായി ബന്ധമില്ലെന്നാണ് റിപ്പോർട്ടുകൾ. കൂടാതെ ഇൗ ഭാഗത്ത്​ യു.എസ്​ - ​നാറ്റോ സൈനിക സംഘങ്ങളുമില്ല.ഗസ്​റ്റ്​ ഹൗസ്​ എന്തിനാണ് ലക്ഷ്യമിട്ടതെന്നത് സംബന്ധിച്ച സൂചനയും ലഭിച്ചിട്ടില്ല. യാത്രക്കാർക്കും വിദ്യാർത്ഥികൾക്കും സൗജന്യമായി ഗസ്റ്റ് ഹൗസിൽ താമസിക്കാം. അതേസമയം, ആക്രമണത്തിന്​ പിന്നിൽ താലിബാനാണെന്ന്​ ആഭ്യന്തര മന്ത്രാലയം കുറ്റപ്പെടുത്തി. വീട്ടിലേക്ക്​ പോകാൻ വാഹനം കാത്തുനിൽക്കുകയായിരുന്ന പൊലീസുകാരും യൂണിവേഴ്സിറ്റി പ്രവേശന പരീക്ഷക്ക്​ എത്തിയ വിദ്യാർത്ഥികളും ആക്രമണ സമയത്ത് ഗസ്റ്റ് ഹൗസിൽ ഉണ്ടായിരുന്നു. ആക്രമണം സംബന്ധിച്ച്​ അന്വേഷണം ആരംഭിച്ചെന്നും ബോംബാക്രമണത്തിൽ ഗെസ്​റ്റ്​ ഹൗസിന്റെ മേൽക്കൂര ഇടിഞ്ഞ്​ വീണെന്നും അവശിഷ്ടങ്ങൾക്കടിയിൽ കൂടുതൽ മൃതദേഹങ്ങൾ കുടുങ്ങിയിട്ടുണ്ടാകുമെന്നും ആഭ്യന്തര മന്ത്രാലയം വക്താവ് താരിഖ് അരിയൻ പറഞ്ഞു.