പാരീസ് : രണ്ടുവർഷത്തെ ഇടവേളയ്ക്ക് ശേഷം അരങ്ങേറിയ 75-ാമത് കാൻ ഫിലിംഫെസ്റ്റിവലിൽ ഒറ്റപ്പെടലിന്റെ കഥപറഞ്ഞ സ്വീഡിഷ് സംവിധായകൻ റൂബൻ ഓസ്‌റ്റ്‌ലൻഡിന്റെ ' ട്രയാംഗിൾ ഒഫ് സാഡ്‌നസ്" മികച്ച സിനിമയ്ക്കുള്ള പാം ഡി ഓർ പുരസ്കാരം സ്വന്തമാക്കി. ഒരു ആഡംബര കപ്പലിൽ നിന്ന് ഒറ്റപ്പെട്ട ദ്വീപിൽ അകപ്പെട്ട രണ്ട് മോഡലുകളുടെയും ശതകോടീശ്വരന്മാരുടെയും കപ്പൽ ജീവനക്കാരുടെയും കഥയാണ് ട്രയാംഗിൾ ഒഫ് സാഡ്നസ്.

2017ൽ ' ദ സ്‌ക്വയർ " എന്ന ചിത്രത്തിനും റൂബൻ പാം ഡി ഓർ സ്വന്തമാക്കിയിരുന്നു. ബെൽജിയൻ സംവിധായകൻ ലുകാസ് ഡോന്റിന്റെ സൗഹൃദങ്ങളുടെ കഥ പറയുന്ന ' ക്ലോസ് " , ആധുനിക നിക്കരാഗ്വയെ പശ്ചാത്തലമാക്കി ഫ്രഞ്ച് സംവിധായിക ക്ലെയർ ഡെന്നിസ് ഒരുക്കിയ റൊമാന്റിക് ത്രില്ലറായ ' സ്റ്റാർസ് അറ്റ് നൂൺ " എന്നിവ രണ്ടാമത്തെ ബഹുമതിയായ ഗ്രാൻ പ്രീ പുരസ്കാരം പങ്കിട്ടു.

ഇറ്റാലിയൻ ഭാഷയിലുള്ള ദ എയിറ്റ് മൗണ്ടൻസ്, പോളിഷ് ചിത്രം ഇഒ എന്നിവയ്ക്ക് ജൂറി പുരസ്കാരങ്ങൾ ലഭിച്ചു. ദക്ഷിണ കൊറിയൻ താരം സോംഗ് കാംഗ് - ഹോയാണ് മികച്ച നടൻ (ചിത്രം ബ്രോക്കർ). ഇറാനിയൻ നടി സാർ അമീർ ഇബ്രാഹിമിയാണ് മികച്ച നടി (ചിത്രം-ഹോളി സ്പൈഡർ). ' ഡിസിഷൻസ് റ്റു ലീവ് " എന്ന റൊമാന്റിക് ത്രില്ലറിലൂടെ ദക്ഷിണ കൊറിയൻ സംവിധായകൻ പാർക് ചാൻ വൂ മികച്ച സംവിധായകനായി.

 അഭിമാനമായി ഇന്ത്യൻ ഡോക്യുമെന്ററി

മികച്ച ഡോക്യുമെന്ററിക്കുള്ള ഗോൾഡൻ ഐ പുരസ്‌കാരം ഇന്ത്യയിൽ നിന്നുള്ള 'ഓൾ ദാ​റ്റ് ബ്രീത്‌സ് "സ്വന്തമാക്കി. 5000 യൂറോയാണ് (4.16ലക്ഷം രൂപ) സമ്മാനത്തുക. ഡൽഹിയിൽ മുഹമ്മദ് സൗദ്, നദീം ഷഹ്സാദ് എന്നീ സഹോദരങ്ങൾ പരിക്കേ​റ്റ പക്ഷികളെ രക്ഷിക്കുന്നതിനെക്കുറിച്ചാണ് ഒന്നര മണിക്കൂർ ഡോക്യുമെന്ററി. ഷൗനക് സെന്നാണ് സംവിധാനം. സൺഡാൻസ് ഫിലിം ഫെസ്റ്റിവലിലും പുരസ്കാരം ലഭിച്ചിരുന്നു.