എ ഐ കാമറ വിവാദം, ഉപകരാർ നിയമപരം, കെൽട്രോണിനെതിരായ ആരോപണം വ്യവസായ പ്രിൻസിപ്പൽ സെക്രട്ടറി അന്വേഷിക്കുമെന്ന് മന്ത്രി

തിരുവനന്തപുരം : എ.ഐ കാമറ സ്ഥാപിക്കുന്നതിൽ കെൽട്രോൺ ഉപകരാർ നൽകിയത് നിയമപരമായാണെന്ന് മന്ത്രി പി. രാജീവ് പറഞ്ഞു. ഉപകരാർ കൊടുത്തതിനെ കുറിച്ച് കെൽട്രോൺ സർക്കാരിനെ അറിയിച്ചിരുന്നു,​ ടെണ്ടറുമായി ബന്ധപ്പെട്ട കാര്യങ്ങളെല്ലാം നിയമപരമായാണ് ചെയ്തത്. ഉപകരാർ കൊടുക്കുന്നത് മന്ത്രിസഭയെ അറിയിക്കേണ്ടതില്ലെന്നും മന്ത്രി വിശദീകരിച്ചു.

എ.ഐ കാമറയുമായി ബന്ധപ്പെട്ട് കെൽട്രോണുമായി ചേർന്ന് ഉയർന്ന വിവാദം അന്വേഷിക്കാൻ വ്യവസായ പ്രിൻസിപ്പൽ സെക്രട്ടറിയെ നിയോഗിച്ചതായും മന്ത്രി പറഞ്ഞു. ഇതുമായി ബന്ധപ്പെട്ട പരാതിയിലെ വിജിലൻസ് അന്വേഷണത്തിന് സഹായകമായി ഫയലുകളെല്ലാം കൊടുക്കാൻ നിർദ്ദേശിച്ചതായും മന്ത്രി വിശദീകരിച്ചു,​ വിജിലൻസ് അന്വേഷണം കെൽട്രോണിനെതിരെയല്ല ഉദ്യോഗസ്ഥനെതിരെയാണെന്നും മന്ത്രി പറഞ്ഞു.

ഉമ്മൻചാണ്ടി 100 കാമറ സ്ഥാപിച്ചതിന് 40 കോടി ചെലവാക്കിയെന്നും മന്ത്രി ആരോപിച്ചു. സർക്കാരിന് മറച്ചുവയ്ക്കാൻ ഒന്നുമില്ലെന്നും പദ്ധതിയുടെ ടെണ്ടർ രേഖകൾ പൊതുമദ്ധ്യത്തിലുണ്ടെന്നും മന്ത്രി വിശദീകരിച്ചു.