വീട് ശുചിയായി സൂക്ഷിക്കണോ, അടുക്കളയിൽ നിന്ന് തുടങ്ങണം വൃത്തിയാക്കൽ

വീട് വൃത്തിയായി സൂക്ഷിക്കാൻ ഇഷ്ടപ്പെടുന്നവരാണ് നാം എല്ലാവരും. വീടിന്റെ പൂമുഖം മുതൽ അടുക്കള വരെ വൃത്തിയായി സൂക്ഷിക്കുന്നത് വളരെ പ്രധാനപ്പെട്ട കാര്യമാണ്. ഒരു വീടിന്റെ പ്രധാനഭാഗമാണ് അടുക്കള. ഒരു വീട്ടിൽ ഏറ്റവും കൂടുതൽ വൃത്തിയായിരിക്കേണ്ട സ്ഥലമാണ് അടുക്കള. അടുക്കള വൃത്തിയാക്കി സൂക്ഷിക്കുന്നത് ആരോഗ്യപൂർണമായ ജീവിതത്തിലേക്കുളള ആദ്യ പടികൂടിയാണ്. വൃത്തിയുളളതും തിളങ്ങുന്നതുമായ അടുക്കള സ്വന്തമാക്കാൻ ചില കാര്യങ്ങൾ ശ്രദ്ധിക്കണം.

തറ വൃത്തിയാക്കാൻ

അടുക്കളയിലെ ഗ്രാനൈറ്റ്, മാർ‌ബിൾ തറയ്ക്ക് തിളക്കം കിട്ടാൻ നല്ലത് ആൽക്കഹോൾ അടങ്ങിയ ക്ലീനറാണ്. ചെറുനാരങ്ങ, വിനാഗിരി എന്നിവ ഉപയോഗിക്കുന്നത് മാർബിളിന്റെ തിളക്കം നഷ്ടമാകുന്നതിന് കാരണമാവും.

പാത്രങ്ങൾ വൃത്തിയായി സൂക്ഷിക്കാം

സോപ്പിനൊപ്പം ബേക്കിംഗ് സോഡ ഉപയോഗിച്ച് പാത്രങ്ങൾ കഴുകുന്നത് പാത്രങ്ങൾ വെട്ടിതിളങ്ങാൻ സഹായിക്കും. വാഷ് ബേസിൻ കഴുകുന്നതിന് അര മണിക്കൂർ മുമ്പുതന്നെ കിച്ചൺ സിങ്കിൽ ബേക്കിങ് സോഡ ഇട്ട് വെക്കുന്നത് വൃത്തിയും തിളക്കവും നൽകുന്നതിന് സഹായിക്കും.

സ്പോഞ്ച് ഉണക്കി സൂക്ഷിക്കുക

ഇ കോളി, സാൽമോണെല്ല തുടങ്ങിയ ബാക്ടീരിയകളുടെ ആവാസസ്ഥാനവും കൂടിയാണ് അടുക്കള. അതിനാൽ പാത്രം കഴുകാനുപയോഗിക്കുന്ന സ്പോഞ്ച് എപ്പോഴും ഉണക്കി സൂക്ഷിക്കുന്നത് നന്നായിരിക്കും. ഭക്ഷണാവശിഷ്ടങ്ങളും കരിയുമെല്ലാം സ്പോഞ്ചിൽ കുതിർന്ന് കിടക്കുന്നത് രോഗകാരികളായ സൂക്ഷ്മ ജീവികളെ പാത്രത്തിലേക്ക് പരത്തുന്നതിന് കാരണമാവും.

ഭക്ഷണാവശിഷ്ടങ്ങൾ

ഭക്ഷണാവശിഷ്ടങ്ങൾ വേസ്റ്റ് ബിന്നിൽ ഇട്ടതിനു ശേഷം മാത്രം സിങ്കില്‍ ഇടുക. അടുക്കളയിലെ സിങ്കിന്റെ ദ്വാരം അടഞ്ഞാൽ ഇൗർക്കിൽ കൊണ്ട് കുത്തി താഴെയിറക്കരുത്. അത് വീണ്ടും പൈപ്പ് അടഞ്ഞു പോവാനേ ഉപകരിക്കൂ. പകരം അതെടുത്ത് കളയുന്നതാണ് നല്ലത്.

കിച്ചൺ കാബിനറ്റ് വൃത്തിയാക്കുമ്പോൾ

വൃത്തിയാക്കാൻ ഏറ്റവും ബുദ്ധിമുട്ടുള്ള സ്ഥലമാണ് കിച്ചൺ കാബിനറ്റ്. നിങ്ങളുടെ വിരലടയാളങ്ങൾ എപ്പോഴും പതിഞ്ഞ് വൃത്തികേടാകുന്ന സ്ഥലമാണ് ഇവിടം. . എല്ലാറ്റിനും ഉപയോഗിക്കാവുന്ന ക്ലീനർ കിച്ചൺ കാബിനറ്റ് വൃത്തിയാക്കാനും ഉപയോഗിക്കാം.

വിനാഗിരി

അടുക്കള വൃത്തിയാക്കാൻ ഏറ്റവും നല്ലത് വിനാഗിരിയാണ്. അടുക്കളയിലെ തറ അര ടീസ്പൂൺ വിനാഗിരി ചേര്‍ത്ത വെളളം ഉപയോഗിച്ച് തുടച്ചു നോക്കൂ. തിളക്കം അനുഭവിച്ചറിയാം.

ഫ്രിഡ്ജ് ഡീ ഫ്രോസ്റ്റ് ചെയ്യുക

ആഴ്ച്ചയിലൊരിക്കൽ ഫ്രിഡ്ജ് ഡീ ഫ്രോസ്റ്റ് ചെയ്യുന്നത് നന്നായിരിക്കും. ഒരു സ്പൂൺ ബേക്കിംഗ് സോഡ ഒരു ലിറ്റർ ചൂടുവെള്ളത്തിൽ കലർത്തുക . ആ ലായനി ഉപയോഗിച്ച് ഫ്രിഡ്ജ് വൃത്തിയാക്കാം.