ഹയർ സെക്കൻഡറി സ്പോർട്സ് ക്വാട്ട ഇന്ന് മുതൽ അപേക്ഷിക്കാം
തിരുവനന്തപുരം: പ്ളസ് വൺ സീറ്റുകളിലേക്കുള്ള സ്പോർട്സ് ക്വാട്ട പ്രവേശനത്തിന് ഇന്ന് മുതൽ മേയ് 30 ന് വൈകിട്ട് അഞ്ച് വരെ ഓൺലൈനായി അപേക്ഷിക്കാം. മെരിറ്റ് ക്വാട്ടയിൽ ഏകജാലക സംവിധാനത്തിൽ അപേക്ഷിച്ചിട്ടുണ്ടെങ്കിലും സ്പോർട്സ് ക്വാട്ടയ്ക്കായി വീണ്ടും അപേക്ഷിക്കണം.
അപേക്ഷയുടെ പ്രിന്റൗട്ടും അനുബന്ധ രേഖകളും വെരിഫിക്കേഷനായി സ്കൂളിൽ നൽകേണ്ടതില്ല. അപേക്ഷാ രജിസ്ട്രേഷൻ ഫീസായ 25 രൂപ പ്രവേശനസമയത്തെ ഫീസിനൊപ്പം നൽകിയാൽ മതി.
പ്രവേശന ഷെഡ്യൂൾ
മുഖ്യഘട്ടം
സ്പോർട്സ് മികവ് രജിസ്ട്രേഷനും വെരിഫിക്കേഷനും മേയ് 21 മുതൽ 29 വരെ. ഓൺലൈൻ രജിസ്ട്രേഷൻ - മേയ് 22, അവസാന തീയതി - മേയ് 30, ഒന്നാം അലോട്ട്മെന്റ് - ജൂൺ 06, അവസാന അലോട്ട്മെന്റ് - ജൂൺ 19.
സപ്ളിമെന്ററി ഘട്ടം
സ്പോർട്സ് മികവ് രജിസ്ട്രേഷനും വെരിഫിക്കേഷനും - മേയ് 21 മുതൽ 25 വരെ. ഓൺലൈൻ രജിസ്ട്രേഷൻ - ജൂൺ 22 മുതൽ 26 വരെ. സപ്ളിമെന്ററി അലോട്ട്മെന്റ് തീയതി - ജൂൺ 28, അവസാന പ്രവേശന തീയതി - ജൂലായ് ഒന്ന്.
(ജൂലായ് ഒന്നിന് പ്രവേശനം പൂർത്തീകരിച്ചശേഷം ഒഴിഞ്ഞുകിടക്കുന്ന സീറ്റുകൾ പൊതുമെരിറ്റ് സീറ്റാക്കി ഒന്നാം സപ്ളിമെന്ററി അലോട്ട്മെന്റിനായുള്ള ഒഴിവിനൊപ്പം പ്രസിദ്ധീകരിക്കും.)
കാരക്കോണം മെഡി. കോളേജിൽ
പുതിയ പി.ജി കോഴ്സും സീറ്റ് വർദ്ധനയും
തിരുവനന്തപുരം : കാരക്കോണം ഡോ. എസ്.എം.സി.എസ്.ഐ മെഡിക്കൽ കോളേജിൽ പുതിയ എം.ഡി ( മൈക്രോബയോളജി) കോഴ്സിന് അനുമതിയും നിലവിലെ പി.ജി കോഴ്സുകളിൽ സീറ്റ് വർദ്ധനയും നാഷണൽ മെഡിക്കൽ കമ്മിഷൻ അനുവദിച്ചു. നിലവിലെ 28 സീറ്റുകൾക്ക് പുറമേ ആറ് കോഴുകളിലായി 13 സീറ്റുകളാണ് അനുവദിച്ചത്. ഈ അദ്ധ്യയനവർഷം മുതൽ 41 സീറ്റിൽ പ്രവേശനം ലഭിക്കും. എം.ഡി സീറ്റുകളും കോഴ്സും
മൈക്രോബയോളജി - രണ്ട് (പുതിയ കോഴ്സ് ), പത്തോളജി - മൂന്ന് , കമ്മ്യൂണിറ്റി മെഡിസിൻ - മൂന്ന്, സൈക്യാട്രി - ഒന്ന്, ജനറൽ സർജറി - രണ്ട്, ഒഫ്താൽമോളജി - രണ്ട്
സാങ്കേതിക വിദ്യാഭ്യാസ ഡയറക്ടർ ഇന്റർവ്യൂ മാറ്റി
തിരുവനന്തപുരം: ഏഴ് വർഷമായി ഒഴിഞ്ഞുകിടക്കുന്ന സാങ്കേതിക വിദ്യാഭ്യാസ ഡയറക്ടർ തസ്തികയിൽ പെരുമാറ്റചട്ടം നിലനിൽക്കെ നിയമനത്തിന് ഇന്ന് നടത്താനിരുന്ന ഇന്റർവ്യൂ മാറ്റി. രണ്ടര ലക്ഷം രൂപ ശമ്പളമുള്ള തസ്തികയിൽ സർക്കാരിന് വേണ്ടപ്പെട്ടയാളെ നിയമിക്കാൻ ശ്രമമെന്ന് ആരോപണമുയർന്നതിനെ തുടർന്നാണിത്. അപേക്ഷകരിൽ 3പേർ ഈ മാസം31ന് വിരമിക്കുന്നുണ്ട്. ഇതിലൊരാളെ നിയമിക്കാനായിരുന്നു തിരക്കിട്ട ഇന്റർവ്യൂ.
ഫെബ്രുവരി 29നാണ് സർക്കാർ എൻജി. കോളേജ് പ്രിൻസിപ്പൽമാരിൽ നിന്നും സാങ്കേതിക വിദ്യാഭ്യാസ ജോയിന്റ് ഡയറക്ടർമാരിൽ നിന്നും അപേക്ഷ ക്ഷണിച്ചത്. എൻജിനിയറിംഗിൽ ഡോക്ടറേറ്റ് ബിരുദത്തിന് പുറമേ ഇരുപതു വർഷത്തെ അദ്ധ്യാപനപരിചയവും, പ്രിൻസിപ്പൽ അഥവാ ജോയിന്റ് ഡയറക്ടറായുള്ള പരിചയവുമാണ് യോഗ്യത. 10പേരെയാണ് ഇന്നത്തെ അഭിമുഖത്തിന് വിളിച്ചിരുന്നത്. ഉന്നത വിദ്യാഭ്യാസ സെക്രട്ടറി, ഡിജിറ്റൽ യൂണിവേഴ്സിറ്റി വിസി, ഉന്നത വിദ്യാഭ്യാസ കൗൺസിൽ മെമ്പർ സെക്രട്ടറി എന്നിവരാണ് സെലക്ഷൻ കമ്മിറ്റി അംഗങ്ങൾ. അഭിമുഖത്തിന് ക്ഷണിച്ചിരുന്ന ഡോ. രഘുരാജ്, ഡോ. രാജശ്രീ (മുൻ വിസി), ഡോ. ശ്രീലക്ഷ്മി എന്നിവർ 31ന് വിരമിക്കുകയാണ്.