ചെൽസിയെ ചതച്ച് സിറ്റി സ്റ്റാർട്ടായി
ലണ്ടൻ: ഇംഗ്ലീഷ് പ്രിമിയർ ലീഗിലെ നിലവിലെ ചാമ്പ്യന്മാരായ മാഞ്ചസ്റ്റർ സിറ്റി പുതിയ സീസണിലും വിജയത്തോടെ തുടങ്ങി. ഇന്നലെ നടന്ന മത്സരത്തിൽ സിറ്റി ഏകപക്ഷീയമായ രണ്ട് ഗോളിന് ചെൽസിയെ കീഴടക്കി. ചെൽസിയുടെ തട്ടകമായ സ്റ്റാംഫോർഡ് ബ്രിഡ്ജിൽ നടന്ന മത്സരത്തിൽ ഹാളണ്ടും കൊവസിച്ചുമാണ് സിറ്റിക്കായി ലക്ഷ്യം കണ്ടത്. കഴിഞ്ഞ സീസണിൽ മികച്ച പ്രകടനം നടത്തിയ ആഴ്സനലും വിജയത്തോടെ തുടങ്ങി. സീസണിലെ തങ്ങളുടെ ആദ്യ മത്സരത്തിൽ ആഴ്സനൽ വൂൾവ്സിനെ മറുപടിയില്ലാത്ത രണ്ട് ഗോളുകൾക്ക് കീഴടക്കി. ഹാവേർട്ട്സും സാക്കയുമാണ് ആഴ്സനലിന്റെ സ്കോറർമാർ. മറ്റൊരു മത്സരത്തിൽ ആസ്റ്റൺ വില്ല 2-1ന് വെസ്റ്റ് ഹാമിനെ കീഴടക്കി. ബ്രന്റ് ഫോർഡ് 2-1ന് ക്രിസ്റ്റൽ പാലസിനെയും ന്യൂകാസിൽ 1-0ത്തിന് സൗത്താംപ്ടണേയും കീഴടക്കി.അതേസമയം എവർട്ടൺ മറുപടിയില്ലാത്ത മൂന്ന് ഗോളുകൾക്ക് ബ്രൈറ്റണിനോട് തോറ്റു.