അഡ്വ. ബെയ്ലിൻ ദാസിന്റെ പ്രാക്ടീസ് വിലക്ക് നീക്കി

കൊച്ചി: ജൂനിയർ അഭിഭാഷകയെ മർദ്ദിച്ച കേസിലെ പ്രതി അഡ്വ. ബെയ്‌ലിൻ ദാസിന് ഏർപ്പെടുത്തിയ പ്രാക്ടീസ് വിലക്ക് ഉപാധികളോടെ പിൻവലിച്ചതായി ബാർ കൗൺസിൽ ഹൈക്കോടതിയെ അറിയിച്ചു. അഭിഭാഷകയുടെ പരാതിയിൽ പ്രാക്ടീസ് വിലക്കിയതിനെ ചോദ്യം ചെയ്ത് ബെയ്‌ലിൻ ദാസ് നൽകിയ ഹർജിയിലാണ് ബാർ കൗൺസിലിന്റെ വിശദീകരണം. ജൂലായ് 11ന് ചേർന്ന ബാർ കൗൺസിൽ യോഗം അച്ചടക്ക നടപടിയുമായി ബന്ധപ്പെട്ട നടപടിക്രമങ്ങളിൽ സഹകരിക്കണമെന്ന ഉപാധികളോടെ പ്രാക്ടീസ് അനുവദിക്കാൻ തീരുമാനിച്ചു. കേസിൽ വിചാരണ നടക്കാനിരിക്കെ തനിക്കെതിരെ അച്ചടക്ക നടപടിയുണ്ടാകുന്നത് വിചാരണയെ ബാധിക്കുമെന്ന് ബെയ്ലിൻ വാദിച്ചു. ഇതു സംബന്ധിച്ച് ബാർ കൗൺസിലിന് വീണ്ടും നിവേദനം നൽകാൻ ഹർജിക്കാരനോടും ഉചിത തീരുമാനമെടുക്കാൻ ബാർ കൗൺസിലിനോടും നിർദ്ദേശിച്ച് കോടതി ഹർജി തീർപ്പാക്കി.