അധികം വൈകാതെ പമ്പുകളിലെ ഡീസല്‍ വില്‍പ്പന അവസാനിക്കും? രണ്ടാം സ്ഥാനം നഷ്ടമായി

തിരുവനന്തപുരം: സംസ്ഥാനത്ത് ഡീസല്‍ വാഹനങ്ങളെ പിന്തള്ളി ഇലക്ട്രിക് വാഹനങ്ങളുടെ നിശബ്ദ കുതിപ്പ്. കഴിഞ്ഞ രണ്ടു വര്‍ഷത്തിനുള്ളില്‍ ഇ വാഹനങ്ങളുടെ വില്‍പ്പനയില്‍ ഇരട്ടിയിലേറെ വര്‍ദ്ധനയുണ്ടായി.

പെട്രോള്‍ വാഹനങ്ങള്‍ക്കാണ് ഇപ്പോഴും വിപണിയില്‍ ആധിപത്യം. ഈ ആധിപത്യത്തിന് അടുത്തൊന്നും കാര്യമായ ഇടിവ് സംഭവിക്കില്ലെന്നാണ് സാമ്പത്തിക സ്ഥിതിവിവരക്കണക്ക് വകുപ്പിന്റെ പഠന റിപ്പോര്‍ട്ട് സൂചന. 2023നെ അപേക്ഷിച്ച് കഴിഞ്ഞ വര്‍ഷം സി.എന്‍.ജി വാഹനങ്ങളുടെ വിപണിയില്‍ ഇടിവു സംഭവിച്ചു. എഥനോള്‍ കലര്‍ന്ന ഇന്ധനം ഉപയോഗിക്കുന്ന 9 വാഹനങ്ങള്‍ കഴിഞ്ഞ വര്‍ഷം സംസ്ഥാനത്ത് രജിസ്റ്റര്‍ ചെയ്തു.

ലക്ഷ്യം ഒരു ലക്ഷം

2022 വരെ പെട്രോളിനു പിന്നില്‍ ഡീസല്‍ വാഹനങ്ങളായിരുന്നു ഏറ്റവും കൂടുതല്‍ വില്‍പ്പന നടന്നിരുന്നത്. 55990 ഡീസല്‍ വാഹനങ്ങള്‍ സംസ്ഥാനത്ത് രജിസ്റ്റര്‍ ചെയ്തപ്പോള്‍ 39690 ഇ വാഹനങ്ങളാണ് രജിസ്റ്റര്‍ ചെയ്യപ്പെട്ടത്. എന്നാല്‍, കഴിഞ്ഞ വര്‍ഷം 56861 ഡീസല്‍ വാഹനങ്ങള്‍ പുറത്തിറങ്ങിയപ്പോള്‍ 86888 ഇ വാഹനങ്ങളാണ് നിരത്തിലെത്തിയത്. ഈ വര്‍ഷാവസാനത്തോടെ ഒരു ലക്ഷത്തില്‍ കൂടുതല്‍ ഇ വാഹനങ്ങള്‍ വില്‍ക്കപ്പെടുമെന്നാണ് വിപണിയിലെ ട്രെന്‍ഡ് സൂചിപ്പിക്കുന്നത്.

വാഹനങ്ങള്‍-- 2024-- 2023-- 2022--- 2021-- 2020

സി.എന്‍.ജി -- 13,821-- 17,167-- 9,840 --- 2,798-- 101

ഇലക്ട്രിക് -- 86888--- 75813--- 39630 ---8740---- 1374

പെട്രോള്‍-- 621572-- 609854--678602-- 700997-- 589444

ഡീസല്‍ -- 56821-- 56376-- 55990-- 53229 -- 50177

എഥനോളില്‍ ലക്ഷ്യം നേടി രാജ്യം

പൊതുമേഖലാ എണ്ണക്കമ്പനികളുടെ പെട്രോള്‍ പമ്പുകള്‍ വഴി കേന്ദ്രഭരണ പ്രദേശങ്ങള്‍ ഉള്‍പ്പെടെ രാജ്യത്തെ എല്ലാ സംസ്ഥാനങ്ങളിലും 20% എഥനോള്‍ ചേര്‍ത്ത പെട്രോള്‍(ഇ 20)എത്തിക്കുന്ന ലക്ഷ്യം രാജ്യം ഏപ്രില്‍ ഒന്നിന് നേടിയിരന്നു.

20% എഥനോള്‍ ചേര്‍ത്ത പെട്രോള്‍ വില്‍പ്പനയുടെ ആദ്യഘട്ടം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തത് 2023ല്‍ ആയിരുന്നു. അന്ന് 15 നഗരങ്ങളിലാണ് വിതരണം ഉണ്ടായിരുന്നത്. 2030നുള്ളില്‍ രാജ്യമാകെ ഇ 20 എന്ന ലക്ഷ്യം കൈവരിക്കാനാണ് ആദ്യം ലക്ഷ്യമിട്ടതെങ്കിലും പിന്നീട് അത് 2025 ഏപ്രില്‍ ഒന്നാക്കി നിശ്ചയിക്കുകയായിരുന്നു. എഥനോള്‍ വാഹനങ്ങളില്‍ കൂടുതല്‍ പരീക്ഷണങ്ങള്‍ നടന്നുവരികയാണ്.