"രണ്ട് വിവാഹം കഴിച്ചു, പക്ഷേ; ഞാൻ അനുഭവിച്ചത് ശത്രുവിന് പോലും വരരുതേ എന്ന് പ്രാർത്ഥിക്കാറുണ്ട്‌"

നല്ലൊരു ജീവിത പങ്കാളിയെ കിട്ടാത്തതിന്റെ വിഷമം ഇപ്പോഴുമുണ്ടെന്ന് നടി ശാന്തി കൃഷ്ണ. രണ്ട് കല്യാണം കഴിച്ചു. എന്നാൽ താൻ ആഗ്രഹിച്ചപോലെയൊരാളെ കിട്ടിയില്ലെന്നും നടി പറഞ്ഞു. ഒരു യൂട്യൂബ് ചാനലിന് നൽകിയ അഭിമുഖത്തിൽ സംസാരിക്കുയായിരുന്നു അവർ. 'കൊടുക്കാനായിട്ട് ഇപ്പോഴും എന്റെ മനസിൽ ധാരാളം സ്‌നേഹമുണ്ട്. പക്ഷേ അങ്ങനെ എന്നെ മനസിലാക്കി ലൈഫിലൊരാൾ വന്നില്ലല്ലോ എന്ന വിഷമമുണ്ട്. അത് ജീവിതത്തിന്റെ ഭാഗമാണ്. എന്റെ മക്കളും ഫാമിലിയുമാണ് എറ്റവും വലിയ ഭാഗ്യമായി കരുതുന്നത്. അച്ഛനെ ഒരുപാട് മിസ് ചെയ്യുന്നുണ്ട്. മക്കളില്ലെങ്കിൽ ഞാനില്ല. രണ്ട് മക്കളും പക്വതയുള്ളവരാണ്. എനിക്ക് സങ്കടം വന്നാൽ അവരാണ് ആശ്വസിപ്പിക്കുക. അമ്മയുടെ ലൈഫിലെന്തൊക്കെ സംഭവിച്ചിട്ടുണ്ടെന്ന് അവർക്കറിയാം. എന്റെ ലൈഫിലെ രണ്ട് പാർട്‌ണേഴ്സും എനിക്ക് ശരിയായില്ല. അത്രയേ വിധിയുണ്ടാകൂ. പറയാൻ പറ്റില്ല. തീർച്ചയായും നല്ലൊരു പാർട്ണറെ മിസ് ചെയ്യുന്നുണ്ട്. നമുക്ക് പറയാൻ പറ്റില്ല. ഒന്നും ഞാൻ പ്ലാൻ ചെയ്യുന്നില്ല. ലൈഫിന്റെ മൂവ്‌മെന്റിൽ അങ്ങനെ ആരെങ്കിലും, 'വരൂ' എന്നൊക്കെ പറയുമോയെന്നാർക്കറിയാം. ഇതെനി വിവാദമാകരുത് കേട്ടോ. ഞാൻ ചുമ്മാ തമാശ പറഞ്ഞതാണ്. ഇപ്പോൾ ആരുമില്ല. ഞാൻ വളരെ സന്തോഷത്തിലാണ്. മക്കളാണ് എല്ലാം. വീണ്ടും ഡാൻസ് ക്ലാസ് തുടങ്ങനാണ് ആഗ്രഹം. ഞാൻ കൊച്ചിയിലേക്ക് ഷിഫ്റ്റ് ചെയ്തു. മൈൻഡ് അതിൽ ഫോക്കസ് ചെയ്യുകയാണ്. സിനിമ ഇല്ലെങ്കിലും ജീവിക്കേണ്ടേ.'- നടി വ്യക്തമാക്കി.

'ഞാൻ അനുഭവിച്ചത് എന്റെ ശത്രു പോലും അനുഭവിക്കരുതേ എന്നേ ഞാൻ പ്രാർത്ഥിക്കാറുള്ളൂ. കാരണം ഞാൻ അത്രയും അനുഭവിച്ചിട്ടുണ്ട്. കഥയൊക്കെ എഴുതിക്കഴിഞ്ഞാൽ, ഇങ്ങനെയൊക്കെ നടക്കുമോയെന്ന് ആളുകൾക്ക് തോന്നും. പക്ഷേ ജീവിതത്തിൽ അത്രയും കഷ്ടപ്പെട്ടതാണ്. ലൈഫിന്റെ എല്ലാ വശങ്ങളും കണ്ടിട്ടുണ്ട്. ഒരുപാട് കാര്യങ്ങൾ സംഭവിച്ചു.'- ശാന്തി കൃഷ്ണ പറഞ്ഞു.