കാറിടിച്ച് ഓട്ടോഡ്രൈവർ മരിച്ചു

മൂവാറ്റുപുഴ: തേനി സംസ്ഥാനപാതയിൽ ഓട്ടോയിൽ കാറിടിച്ച് ഓട്ടോ ഡ്രൈവർ മരിച്ചു. കല്ലൂർക്കാട് കോച്ചേരിക്കുടിയിൽ അനിലാണ് (52) മരിച്ചത്. വെള്ളിയാഴ്ച ഉച്ചയ്ക്ക് പന്ത്രണ്ടരയോടെ കല്ലൂർക്കാട് കാവുംപടിക്ക് സമീപമായിരുന്നു അപകടം.

കല്ലൂർക്കാട് ദിശയിൽ സഞ്ചരിച്ചിരുന്ന ഓട്ടോയിൽ പിന്നാലെയെത്തിയ കാർ ഇടിക്കുകയായിരുന്നു. ഇടിയുടെ ആഘാതത്തിൽ റോഡ് വശത്തെ ഭിത്തിയിൽ തട്ടിയശേഷം താഴെയുള്ള പൈനാപ്പിൾ തോട്ടത്തിലേക്ക് ഓട്ടോറിക്ഷ തെറിച്ചുവീഴുകയായിരുന്നു. ഓടിക്കൂടിയ സമീപവാസികൾ അനിലിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്‌കാരം ഇന്ന് വൈകിട്ട് 3ന് മൂവാറ്റുപുഴ പൊതുശ്മശാനത്തിൽ. ഭാര്യ: മിനി. മക്കൾ: അതുല്യ, അർജുൻ.