'പാർട്ടി പത്രത്തിലെ മുഖപ്രസംഗം കോൺഗ്രസ് നിലപാടിനെതിര്', തിരുത്താൻ നിർദേശം നൽകിയിട്ടുണ്ടെന്ന് സണ്ണി ജോസഫ്

തിരുവനന്തപുരം: പാർട്ടി പത്രത്തിൽ രാഹുൽ മാങ്കൂട്ടത്തിൽ എംഎൽഎയെ പിന്തുണച്ചുകൊണ്ടുവന്ന മുഖപ്രസംഗം കോൺഗ്രസ് നിലപാടിന് എതിരാണെന്ന് കെപിസിസി അദ്ധ്യക്ഷൻ സണ്ണി ജോസഫ്. മുഖപ്രസംഗം പാര്‍ട്ടിയുടെ നയത്തിനും തീരുമാനത്തിനും യോജിച്ചതല്ലെന്ന് മനസിലാക്കിയതിന്റെ അടിസ്ഥാനത്തിൽ തിരുത്താന്‍ നിര്‍ദേശം നല്‍കിയിട്ടുണ്ടെന്ന് അദ്ദഹം കൂട്ടിച്ചേ‌ർത്തു.

'പാർട്ടി പത്രത്തിൽ വരാൻ പാടില്ലാത്ത കാര്യമായിരുന്നു. രാഹുൽ മാങ്കൂട്ടത്തിലിനെ സസ്‌പെൻഡ് ചെയ്തത് സണ്ണി ജോസഫോ വി ഡി സതീശനോ ഒ​റ്റയ്ക്കല്ല. കേരളത്തിലെ കോൺഗ്രസിന്റെ സമുന്നത നേതാക്കൻമാരും മുൻ ഡിസിസി അദ്ധ്യക്ഷൻമാരും ചേർന്നാണ്. 100 ശതമാനവും നേതാക്കൻമാരുടെ സമ്മതോടെയാണ് ഈ തീരുമാനമെടുത്തത്. ആരും ഈ തീരുമാനത്തെ എതിർത്തിട്ടില്ല'- സണ്ണി ജോസഫ് പറഞ്ഞു.

അതേസമയം, മുഖപ്രസംഗത്തിന് പ്രതിപക്ഷനേതാവ് വിഡി സതീശൻ കടുത്ത അതൃപ്തിയാണ് രേഖപ്പെടുത്തിയത്. ഈ വിഷയം പുറത്തുവന്നതോടെ പാർട്ടി രാഹുൽ മാങ്കൂട്ടത്തിലിനെതിരെ നടപടി സ്വീകരിച്ചതാണ്. ഒരു വിഷയത്തിൽ രണ്ട് നടപടി എടുക്കാൻ കഴിയില്ലല്ലോയെന്നും അദ്ദേഹം ചോദിച്ചു.

എന്നാൽ രാഹുൽ മാങ്കൂട്ടത്തിലിനെ ന്യായീകരിക്കേണ്ട ഒരാവശ്യവും പാർട്ടിക്കില്ലെന്നാണ് കോൺഗ്രസ് നേതാവ് കെ മുരളീധരൻ പ്രതികരിച്ചത്. പാപം ചെയ്യാത്തവർ കല്ലെറിയട്ടെയെന്ന് പറഞ്ഞത് സിപിഎമ്മിനെയും എൽഡിഎഫിനെയും ഉദ്ദേശിച്ചാണ്. കാരണം മുകേഷ് എംഎൽഎയ്ക്കെതിരെ ചാർജ് ഷീറ്റുവരെ ഫയൽ ചെയ്തിട്ടും ഒരു നടപടിയും എടുക്കാത്തതിനെക്കുറിച്ചാണ് മുഖപ്രസംഗത്തിൽ പറയുന്നതെന്നും മുരളീധരൻ കൂട്ടിച്ചേർത്തു.

പാപം ചെയ്യാത്തവര്‍ കല്ലെറിയട്ടെ' എന്ന തലക്കെട്ടോടെയാണ് മുഖപ്രസംഗം പ്രസിദ്ധീകരിച്ചത്. രാഹുൽ മാങ്കൂട്ടത്തില്‍ രാഷ്ട്രീയ ഗൂഢാലോചനയുടെ ഇരയാണെന്നായിരുന്നു മുഖപ്രസംഗത്തിലുണ്ടായിരുന്നത്. കോണ്‍ഗ്രസിന്റെ കുപ്പായത്തില്‍ വീണ ചാണകത്തുള്ളികൊണ്ട് മൂക്കുപൊത്തുംപോലെയാണ് സിപിഎം രാഹുല്‍ മാങ്കൂട്ടത്തിലിനെ ചൂണ്ടിക്കാട്ടി സദാചാര പ്രസംഗം നടത്തുന്നതെന്നും മുഖപ്രസംഗത്തിലുണ്ട്.