കൊയിലാണ്ടി എംഎല്‍എ കാനത്തില്‍ ജമീല അന്തരിച്ചു, അന്ത്യം അര്‍ബുദം ബാധിച്ച് ചികിത്സയിലിരിക്കെ
കോഴിക്കോട്: കൊയിലാണ്ടി എംഎല്‍എയും സിപിഎം നേതാവുമായ കാനത്തില്‍ ജമീല (59) അന്തരിച്ചു. അര്‍ബുദ ബാധിതയായി ചികിത്സയില്‍ കഴിയുന്നതിനിടെയാണ് എംഎല്‍എയുടെ അന്ത്യം. നേരത്തെ കോഴിക്കോട് ജില്ലാ പഞ്ചായത്ത് പ്രസിഡന്റ് ആയും അവര്‍ പ്രവര്‍ത്തിച്ചിരുന്നു. അര്‍ബുദബാധിതയായ ജമീല ആറുമാസത്തോളമായി വീട്ടില്‍ വിശ്രമത്തിലായിരുന്നു.
2021ല്‍ കൊയിലാണ്ടിയില്‍ നിന്ന് 8472 വോട്ടുകളുടെ ഭൂരിപക്ഷത്തിനാണ് കോണ്‍ഗ്രസിന്റെ എന്‍ സുബ്രഹ്‌മണ്യനെ പരാജയപ്പെടുത്തി ജമീല നിയമസഭയിലെത്തിയത്. കോഴിക്കോട് ജില്ലയില്‍ പാര്‍ട്ടിയുടെ ശക്തയായ വനിതാ നേതാവാണ് കാനത്തില്‍ ജമീല. ജില്ലാ പഞ്ചായത്ത് പ്രസിഡന്റ് എന്ന നിലയിലെ മികച്ച പ്രകടനവും ജനപ്രീതിയുമാണ് ജമീലയെ നിയമസഭയിലേക്ക് മത്സരിപ്പിക്കാന്‍ അന്ന് പാര്‍ട്ടി തീരുമാനിച്ചതിന് പിന്നില്‍.
രണ്ട് തവണ കോഴിക്കോട് ജില്ലാ പഞ്ചായത്ത് അദ്ധ്യക്ഷയായി തിരഞ്ഞെടുക്കപ്പെട്ട കാനത്തില്‍ ജമീല മലബാറില്‍ നിന്നുള്ള ആദ്യത്തെ മുസ്ലീം വനിതാ എംഎല്‍എയാണ്. അത്തോളി ചോയികുളം സ്വദേശിനിയാണ് കാനത്തില്‍ ജമീല. പരേതരായ ടി.കെ. ആലിയുടേയും മറിയത്തിന്റേയും മകളാണ്. ഭര്‍ത്താവ് കാനത്തില്‍ അബ്ദുറഹ്‌മാന്‍. മക്കള്‍: അയ്‌റീജ് റഹ്‌മാന്‍ (യുഎസ്എ), അനൂജ സുഹൈബ് (ന്യൂനപക്ഷ കോര്‍പ്പറേഷന്‍ ഓഫീസ്- കോഴിക്കോട്). മരുമക്കള്‍: സുഹൈബ്, തേജു. സഹോദരങ്ങള്‍: ജമാല്‍, നസീര്‍, റാബിയ, കരീം (ഗള്‍ഫ്), പരേതയായ ആസ്യ.
അര്‍ബുദം ബാധിച്ച് ചികിത്സയില്‍ കഴിഞ്ഞതിന് ശേഷം അവര്‍ പൊതുരംഗത്ത് നിന്ന് വിട്ടുനിന്നിരുന്നു. വീട്ടില്‍ വിശ്രമത്തിലായിരിക്കെ ആരോഗ്യസ്ഥിതി വഷളായതിനെത്തുടര്‍ന്നാണ് ജമീലയെ ശനിയാഴ്ച വൈകുന്നേരം ആശുപത്രിയില്‍ പ്രവേശിപ്പിച്ചത്. നിയമസഭാ കാലയളവ് പൂര്‍ത്തിയാക്കാന്‍ ആറ് മാസത്തില്‍ താഴെ മാത്രം ബാക്കി നില്‍ക്കെ രണ്ടാമത്തെ ഇടത് എംഎല്‍എയാണ് മരണപ്പെടുന്നത്. പീരുമേട് എംഎല്‍എയും സിപിഐ നേതാവുമായ വാഴൂര്‍ സോമനാണ് മാസങ്ങള്‍ക്ക് മുമ്പ് മരിച്ച മറ്റൊരു എംഎല്‍എ.