ന്യൂഡൽഹി : വിവിധ മേഖലകളിൽ പരസ്പരം സഹകരിച്ച് പ്രവർത്തിക്കാൻ ത്രികക്ഷി സഹകരണ സംവിധാനം പ്രഖ്യാപിച്ച് ഇന്ത്യ,​ യു.എ.ഇ,​ ഫ്രാൻസ് രാജ്യങ്ങൾ. ഊർജ്ജം മുതൽ പരിസ്ഥിതി സംരക്ഷണം വരെയുള്ള മേഖലകളിൽ പരസ്പരം സഹകരിക്കാനും പദ്ധതികൾ നടപ്പാക്കാനുമാണ് തീരുമാനം. സംയുക്ത പ്രസ്താവനയിലാണ് മൂന്നു രാജ്യങ്ങളും പുതിയ സംരംഭം പ്രഖ്യാപിച്ചത്.

ഇന്ത്യൻ വിദേശകാര്യ മന്ത്രി എസ്. ജയശങ്കർ,​ യു.എ.ഇ വിദേശകാര്യമന്ത്രി ഷെയ്ഖ് അബ്ദുള്ള ബിൻ സായിദ് അൽ നഹ്യാൻ,​ ഫ്രഞ്ച് വിദേശ കാര്യമന്ത്രി കാതറിൻ കൊളോണ എന്നിവർ തമ്മിൽ നടത്തിയ ടെലിഫോൺ ചർച്ചകൾക്ക് ശേഷമാണ് സംയുക്ത പ്രസ്താവന പുറപ്പെടുവിച്ചത്.

കാലാവസ്ഥാ വ്യതിയാനം,​ സുസ്ഥിര വികസനം എന്നീ മേഖലകളിൽ മൂന്നു രാജ്യങ്ങളിലെയും വികസന ഏജൻസികൾ സഹകരിച്ച് പ്രവർത്തിക്കും. പദ്ധതികൾ നടപ്പാക്കും. സംയുക്തമായി വിവിധ പരിപാടികളും സംഘടിപ്പിക്കും. ഇന്ത്യ അദ്ധ്യക്ഷത വഹിക്കുന്ന ജി20 ഉച്ചകോടി,​ യു.എ.ഇയിൽ നടക്കുന്ന കോപ്28 ഉച്ചകോടി എന്നീ മേഖലകളിലും മൂന്നു രാജ്യങ്ങളും പരസ്പരം സഹകരിക്കും. ബംഗളുരുവിൽ നടക്കുന്ന ടെക് സമ്മിറ്റ്,​ ദുബായിൽ നടക്കുന്ന ജിറ്റെക്സ്,​ പാരീസിൽ നടക്കുന്ന വിവ ടെക് എന്നിവയിലും മൂന്നു രാജ്യങ്ങളും പരസ്പരം സഹകരിക്കും.