 നടപ്പുവർഷത്തെ ജി.ഡി.പി വളർച്ചാപ്രതീക്ഷ റിസർവ് ബാങ്ക് 7 ശതമാനമായി ഉയർത്തി

കൊച്ചി: നാണയപ്പപ്പെരുപ്പം, ഡോളറിന്റെ മുന്നേറ്റം, രാജ്യങ്ങൾ തമ്മിലെ സംഘർഷം, വിതരണശൃംഖലയിലെ പ്രതിസന്ധി എന്നിങ്ങനെ നിരവധി ആഗോളതല വെല്ലുവിളികളുണ്ടെങ്കിലും ഇന്ത്യൻ സമ്പദ്‌വ്യവസ്ഥ ശക്തമായ നിലയിലാണെന്ന് റിസർവ് ബാങ്ക് ഗവർണർ ശക്തികാന്ത ദാസ് പറഞ്ഞു. നടപ്പുവർഷത്തെ (2022-23) വളർച്ചാപ്രതീക്ഷ റിസർവ് ബാങ്ക് 6.8ൽ നിന്ന് 7 ശതമാനമായും ഉയർത്തി.

വളർച്ചാ നിർണയസൂചികകളെല്ലാം മെച്ചപ്പെടുകയാണ്. ഇത് വിലയിരുത്തിയാൽ 2023-24ൽ ഇന്ത്യ 6.4 ശതമാനം വളരും. ഏപ്രിൽ-ജൂണിൽ 7.8 ശതമാനം, ജൂലായ്-സെപ്തംബറിൽ 6.2 ശതമാനം, ഒക്‌ടോബർ-ഡിസംബറിൽ 6 ശതമാനം, ജനുവരി-മാർച്ചിൽ 5.8 ശതമാനം എന്നിങ്ങനെയും പ്രതീക്ഷിക്കുന്നു.

നാണയപ്പെരുപ്പം താഴേക്ക്

ആഗോളതല വെല്ലുവിളികളുണ്ടെങ്കിലും നാണയപ്പെരുപ്പം 6 ശതമാനത്തിന് താഴെ തുടരുമെന്നാണ് റിസർവ് ബാങ്കിന്റെ വിലയിരുത്തൽ. ഇന്ത്യയുടെ ക്രൂഡോയിൽ വാങ്ങൽവില ബാരലിന് 95 ഡോളർ കണക്കാക്കിയുള്ള വിലയിരുത്തൽ ഇങ്ങനെ:

2022-23 : 6.5%

ജനുവരി-മാർച്ച് : 5.7%

2023-24 : 5.3%

ഏപ്രിൽ-ജൂൺ : 5.0%

ജൂലായ്-സെപ്തംബർ : 5.4%

ഒക്‌ടോബ‌ർ-ഡിസംബർ : 5.4%

ജനുവരി-മാർച്ച് : 5.6%

പലിശനിരക്ക് എങ്ങോട്ട്?

നാണയപ്പെരുപ്പം കുറയുന്നതിനാൽ അടുത്തയോഗങ്ങളിൽ പലിശനിരക്ക് നിലനിറുത്തിയേക്കും. വർഷാന്ത്യത്തിലോ 2024ലോ പലിശനിരക്ക് കുറയ്ക്കാനും സാദ്ധ്യത.

 പലിശനിരക്ക് കുറയ്ക്കാൻ തയ്യാറെന്ന 'അക്കോമഡേറ്റീവിൽ" നിന്ന് പിന്മാറുകയെന്ന നിലപാടിൽ തുടരാൻ ഇന്നലെ തീരുമാനിച്ചു.

 ഇതിനെയും റിപ്പോനിരക്ക് 0.25 ശതമാനം കൂട്ടിയതിനെയും എം.പി.സിയിലെ സ്വതന്ത്രഅംഗങ്ങളായ ഡോ.ആഷിമ ഗോയലും പ്രൊഫ. ജയന്ത് വർമ്മയും എതിർത്തു.

ജി-സെക്, ക്ളൈമറ്റ് ഫിനാൻസ്

സർക്കാർ കടപ്പത്രങ്ങളുപയോഗിച്ച് (ജി-സെക്) കടമെടുക്കാനും വായ്‌പനൽകാനും റിസർവ് ബാങ്കിന്റെ അനുമതി. ജി-സെക് വ്യാപാരസമയം രാവിലെ 9 മുതൽ വൈകിട്ട് 5വരെയുമാക്കി. നിലവിൽ വൈകിട്ട് 3 വരെയായിരുന്നു.

കാലാസ്ഥാവ്യതിയാനത്തെ ചെറുക്കാനുള്ള നടപടികൾക്ക് പിന്തുണയുമായി ഗ്രീൻ ഡെപ്പോസിറ്റ്,​ ക്ളൈമറ്റ് ഫിനാൻസിംഗ് എന്നിവയെക്കുറിച്ചും റിസർവ് ബാങ്ക് ആലോചിക്കും.

ട്രെഡ്‌സ് വിപുലീകരണം

എം.എസ്.എം.ഇക്ക് നേട്ടം

ട്രെഡ്‌സ് സംവിധാനത്തിൽ ഇൻഷ്വറൻസ് കമ്പനികളെയും ഉൾപ്പെടുത്തുമെന്ന റിസർവ് ബാങ്കിന്റെ പ്രഖ്യാപനം എം.എസ്.എം.ഇകൾക്ക് നേട്ടമാകും. നിലവിൽ എം.എസ്.എം.ഇ,​ ബയർമാർ,​ ധനകാര്യസ്ഥാപനങ്ങൾ എന്നിവയാണ് ട്രെഡ്‌സിലുള്ളത്.

ഇടപാടുകാരിൽ നിന്ന് പണം ലഭിക്കുംവരെ വ്യാപാരിക്ക് ഇടപാടിന്റെ ഈടിന്മേൽ പണം നൽകുന്ന ഇലക്‌ട്രോണിക് സംവിധാനമാണ് ട്രെഡ്‌സ് (ട്രേഡ് റിസീവബിൾസ് ഡിസ്‌കൗണ്ടിംഗ് സിസ്‌റ്റം)​. ഇൻവോയിസ് ഫിനാൻസിംഗിന് ഇനി ഇൻഷ്വറൻസ് പരിരക്ഷ ലഭിക്കും.

അദാനിവിഷയം ബാധിക്കില്ല

''ഏതെങ്കിലും വ്യക്തിക്കോ ഗ്രൂപ്പിനോ എതിരെയുള്ള കേസുകൾ ഇന്ത്യൻ ധനകാര്യസംവിധാനത്തെ ബാധിക്കില്ല. ബാങ്കുകളും എൻ.ബി.എഫ്.സികളും ഉൾപ്പെടുന്ന ധനകാര്യമേഖല ഏറെ ശക്തമാണ്""

ശക്തികാന്ത ദാസ്,​

ഗവർണർ,​ റിസർവ് ബാങ്ക്

(അദാനിവിഷയത്തെ കുറിച്ച് മാദ്ധ്യമങ്ങളുടെ ചോദ്യത്തിന് മറുപടി നൽകുകയായിരുന്നു അദ്ദേഹം)​