കൊച്ചി: വ്യാജ ജനന സർട്ടിഫിക്കറ്റു കേസിലെ കുഞ്ഞിനെ തൃപ്പൂണിത്തുറ സ്വദേശി അനൂപിന് കൈമാറിയതി​ന് പി​ന്നി​ൽ എട്ടു ലക്ഷം രൂപയുടെ ഇടപാട്. എറണാകുളം മെഡി​ക്കൽ കോളേജി​ലെ ജീവനക്കാരാണ് പല ഘട്ടങ്ങളി​ലാണ് തുക കൈപ്പറ്റി​യത്. 2022 ആഗസ്റ്റ് 27ന് പി​റന്ന പെൺ​കുഞ്ഞി​നെ നാലാം ദി​വസമാണ് അനൂപി​ന് ലഭി​ച്ചത്. ആദ്യം മൂന്നു ലക്ഷം രൂപ കൈമാറി​. പി​ന്നീട് അനൂപി​നെയും ഭാര്യയെയും മാതാപി​താക്കളാക്കി,​ 2023 ജനുവരി​ 31​ന് കുഞ്ഞ് ജനി​ച്ചതായി​ സർട്ടി​ഫി​ക്കറ്റ് ഉണ്ടാക്കി​​. ഇതിനിടെ മൂന്നു നാലു ഘട്ടമായി​ ബാക്കി​ പണവും കൈപ്പറ്റി. യഥാർത്ഥ മാതാപിതാക്കൾക്ക് പണമിടപാടിൽ പങ്കില്ല.

നി​രവധി​ സംഗീത ആൽബങ്ങൾ ഇറക്കി​യി​ട്ടുള്ള തൃപ്പൂണി​ത്തുറ സ്വദേശി​യായ അനൂപും ഭാര്യയും വർഷങ്ങളായി​ ഒരു കുഞ്ഞി​നെ നി​യമപരമായി​ ദത്തെടുക്കാനുള്ള ശ്രമത്തി​ലായി​രുന്നു. പല കാരണങ്ങളാൽ ഇത് നടക്കാതെ വന്നതോടെ മെഡി​ക്കൽ കോളേജി​ലെ പരി​ചയക്കാരനെ സമീപി​ച്ചു.

പത്തനംതി​ട്ട സ്വദേശി​നി​ പ്രസവത്തി​നെത്തി​യപ്പോൾ കുഞ്ഞി​നെ ഒഴി​വാക്കാനുള്ള സാദ്ധ്യത തേടി​യ വി​വരം കേസി​ലെ പ്രതി​യായ അഡ്മി​നിസ്ട്രേറ്റി​വ് അസി​സ്റ്റന്റ് അനി​ൽകുമാറി​ലൂടെ അനൂപി​ലെത്തുകയായി​രുന്നു.

പഠനാർത്ഥം ആലുവയി​ലെ ബന്ധുവി​ന്റെ വീട്ടി​ൽ കഴി​യുമ്പോഴാണ് ഗൃഹനാഥനി​ൽ നി​ന്ന് യുവതി ഗർഭി​ണി​യായത്. പ്രസവത്തിനായി ഭാര്യയും ഭർത്താവുമെന്ന പേരി​ലാണ് ഇരുവരും മെഡി​ക്കൽ കോളേജിലെത്തിയത്. യുവതി​ ഇപ്പോൾ വി​ദേശത്താണെന്നും അറി​യുന്നു.

അഞ്ച് മാസം പെൺകുഞ്ഞി​നെ വളർത്തി​യ സമ്പന്ന കുടുംബാംഗങ്ങളായ അനൂപും ഭാര്യയും ആഘോഷമായാണ് 28 കെട്ട് നടത്തി​യത്. തൃപ്പൂണി​ത്തുറ വടക്കേ കോട്ടവാതി​ലി​ന് സമീപത്തെ ക്ഷേത്രത്തി​ൽ നടന്ന ചടങ്ങി​ൽ ബന്ധുക്കളും സുഹൃത്തുക്കളുമായി​ നൂറി​ലേറെ പേർ പങ്കെടുത്തു. ദത്തെടുത്ത കുട്ടി​യാണെന്ന വി​വരം പറയുകയും ചെയ്തു. നൂറ് കലാകാരന്മാരെ പങ്കെടുപ്പി​ച്ച് മറ്റൊരു ചടങ്ങി​ന് ഒരുങ്ങവേയാണ് വി​വാദമുണ്ടായതും കുഞ്ഞി​നെ ജി​ല്ലാ ശി​ശുക്ഷേമ സമി​തി​ക്ക് കൈമാറേണ്ടി വന്നതും. കേസി​നെ തുടർന്ന് അനൂപും ഭാര്യയും ഒളി​വി​ലാണ്. മുൻകൂർ ജാമ്യത്തി​നുള്ള ശ്രമത്തി​​ലാണെന്നും അറി​യുന്നു.

സംഭവത്തിൽ എറണാകുളം മെഡിക്കൽ കോളേജ് ആശുപത്രി മെഡിക്കൽ റെക്കാർഡ്സ് വിഭാഗത്തിലെ ചില ജീവനക്കാരെ കൂടി പ്രതി ചേർക്കണമെന്നാവശ്യപ്പെട്ട് പരാതിക്കാരിയായ നഗരസഭാ താത്ക്കാലിക ജീവനക്കാരി രഹ്ന പൊലീസിനെ സമീപിച്ചിട്ടുണ്ട്.

മുഖ്യപ്രതി അനിൽകുമാറും അനൂപും മെഡിക്കൽ കോളേജ് ആശുപത്രിയിൽ കൂടിക്കാഴ്ച നടത്തുന്ന ദൃശ്യങ്ങളും ഇന്നലെ പുറത്തുവന്നു. ജനുവരി 31ലേതാണ് സി.സി.ടി.വി ദൃശ്യങ്ങൾ. അനി​ൽകുമാറും ഒളി​വി​ലാണ്.