കോട്ടയം: വീടിന് തീപിടിച്ച് വീട്ടമ്മ മരിച്ചു. കോട്ടയം മണിമല പാറവിളയിൽ രാജം (70) ആണ് മരിച്ചത്. വീട്ടിലുണ്ടായിരുന്ന ഇവരുടെ ഭർത്താവ് സെൽവരാജനും (76) മകൻ വീനിഷിനും (30) പരിക്കേറ്റിട്ടുണ്ട്. ഇവരെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. വെള്ളിയാഴ്ച രാത്രി 12.30നായിരുന്നു സംഭവം. തീപിടുത്തത്തിൽ വീടിന്റെ താഴത്തെ നില പൂർണമായും കത്തി നശിച്ചു.

വീടിന്റെ മുകൾ നിലയിലുണ്ടായിരുന്ന മകന്റെ ഭാര്യയും രണ്ട് മക്കളും രക്ഷപ്പെട്ടു. ഭാര്യയെയും കുഞ്ഞുങ്ങളെയും രക്ഷപ്പെടുത്തിയശേഷം വീനിഷ് മുകൾ നിലയിൽ നിന്നും ചാടി രക്ഷപ്പെടാൻ ശ്രമിക്കവെയാണ് പരിക്ക് പറ്റിയത്.

താഴത്തെ നിലയിൽ ഉണ്ടായിരുന്ന സെൽവരാജിനെയും രാജത്തെയും നാട്ടുകാരും അഗ്നിരക്ഷാസേനയും ചേർന്നാണ് പുറത്തെത്തിച്ചത്. വിഷപ്പുക ശ്വസിച്ച് രാജത്തിന്റെ നിലഗുരുതരമായിരുന്നു. നാട്ടുകാർ ചേർന്നാണ് ആദ്യം രക്ഷാപ്രവർത്തനം നടത്തിയത്. കാഞ്ഞിരപ്പള്ളി അഗ്നിരക്ഷാസേന എത്തിയെങ്കിലും വാഹനത്തിന് വീടിന് സമീപത്തേയ്ക്ക് എത്താൻ സാധിക്കാത്തതിനാൽ ഒരു കിലോമീറ്റ‌‌ർ നടന്നാണ് ഉദ്യോഗസ്ഥർ വീട്ടിൽ എത്തിയത്.