ഇന്നസെന്റ് എന്ന വ്യക്തിയുടെ ശക്തിയായിരുന്നു ഭാര്യ ആലീസ്. നാല് പതിറ്റാണ്ടിലേരെ ഒന്നിച്ച് ജീവിച്ചവർ... അഭിമുഖങ്ങളിൽ പോലും അദ്ദേഹം ഭാര്യയെ കുറിച്ച് വാചാലനാകാറുണ്ട്. ഓരോ നിമിഷവും ആസ്വദിക്കണമെന്ന് വിശ്വസിച്ചിരുന്ന വ്യക്തികൂടിയായിരുന്നു ഇന്നസെന്റ്.

ഷൂട്ടിംഗ് ഒഴികെയുള്ള മിക്ക സന്ദർഭങ്ങളിലും തങ്ങൾ ഒന്നിച്ചായിരിക്കുമെന്ന് മുൻപ് ആലീസ് പറഞ്ഞിട്ടുണ്ട്. 2013ലാണ് ഇന്നസെന്റിന് കാൻസർ സ്ഥിരീകരിച്ചത്. രോഗം പോലും ഇരുവരും 'പങ്കിട്ടു'. തൊട്ടടുത്ത വർഷമാണ് ആലീസിന് കാൻസർ സ്ഥിരീകരിക്കുന്നത്. തനിക്ക് രോഗം വന്നതിനേക്കാൾ ഇന്നസെന്റിനെ തളർത്തിയത് ഭാര്യയുടെ അസുഖമായിരുന്നു.

എല്ലാ പ്രതിസന്ധിഘട്ടങ്ങളിലും ഇരുവരും പരസ്പരം താങ്ങായി. കീമോയ്ക്ക് വരെ ഒന്നിച്ചായിരുന്നു ഇരുവരും പോയിരുന്നത്. ഒന്നിച്ച് രോഗം വന്നത് നന്നായി, വണ്ടിക്കൂലിയടക്കമുള്ള ചെലവ് കുറയുമല്ലോ എന്നായിരുന്നു ഇന്നസെന്റ് തമാശരൂപേണ പറഞ്ഞിരുന്നത്. ഇന്നസെന്റിനൊപ്പം ഭാര്യയും രോഗത്തെ കീഴടക്കി.

ഇരുവരുടെയും പ്രണയ വിവാഹമായിരുന്നെന്ന് ഗോസിപ്പുകളുണ്ടായിരുന്നെങ്കിലും, പക്കാ അറേഞ്ചിഡ് മാര്യേജ് ആയിരുന്നു തങ്ങളുടേതെന്ന് അദ്ദേഹം വ്യക്തമാക്കിയിരുന്നു. ഇപ്പോൾ പ്രിയതമയെ തനിച്ചാക്കി അദ്ദേഹം യാത്രയായിരിക്കുകയാണ്. ഭർത്താവിന്റെ വിയോഗം താങ്ങാനാകാതെ പൊട്ടിക്കരയുന്ന ആലീസ് ഏവർക്കും നോവാകുകയാണ്.