കൊച്ചി: ബ്രഹ്മപുരം പ്ളാന്റ് നടത്തിപ്പിലെ മറ്റൊരു വീഴ്ചകൂടി പുറത്ത്. മറ്റ് തദ്ദേശ സ്ഥാപനങ്ങളെ മാലിന്യം തള്ളുമ്പോൾ ലഭിക്കേണ്ട ഫീസ് വാങ്ങിയെടുക്കുന്നതിൽ കൊച്ചി കോർപ്പറേഷൻ പരാജയമെന്ന് ഓഡിറ്റ് റിപ്പോർട്ട്. 2020-21ൽ മാത്രം 1.40 കോടിയോളം രൂപ കുടിശികയായെന്ന് സംസ്ഥാന ഓഡിറ്റ് വകുപ്പിന്റെ റിപ്പോർട്ടിൽ പറയുന്നു. വിശദീകരണം തേടി കഴിഞ്ഞ വർഷം മേയ് 9ന് ഓഡിറ്റ് വകുപ്പ് നടത്തിയ അന്വേഷണത്തിന് കോർപ്പറേഷൻ മറുപടിയും നൽകിയില്ല.
കൃത്യമായി പണം വാങ്ങുന്നില്ല, റേറ്റ് പരിഷ്കരിച്ച് കരാർ പുതുക്കുന്നില്ല, പണം അക്കൗണ്ടിലേക്ക് വാങ്ങുന്നതിലെ വീഴ്ചകൾ മൂലം അക്കൗണ്ടിംഗ് ശരിയാകുന്നില്ല എന്നീ കാരണങ്ങൾ റിപ്പോർട്ടിൽ അക്കമിട്ട് പറയുന്നുണ്ട്.
ആലുവ, അങ്കമാലി, കളമശേരി, തൃപ്പൂണിത്തുറ, തൃക്കാക്കര നഗരസഭകളിൽ നിന്നും ചേരാനല്ലൂർ, കുമ്പളങ്ങി, വടവുകോട്-പുത്തൻകുരിശ് പഞ്ചായത്തുകളിൽ നിന്നുമാണ് ബ്രഹ്മപുരത്തേക്ക് ജൈവമാലിന്യം എത്തിക്കുന്നത്. ഇതിനായി ഓരോ തദ്ദേശ സ്ഥാപനവുമായും നിരക്ക് ഉൾപ്പടെ കോർപ്പറേഷൻ കരാർ ഒപ്പുവച്ചിട്ടുണ്ട്.
ടണ്ണിന് 788 രൂപ മുതൽ 1566 വരെ വ്യത്യസ്ത നിരക്കുകളുമാണ്. കരാർ പ്രകാരം നിശ്ചിതകാലയളവിന് ശേഷം 5 ശതമാനം വീതം ഫീസ് വർദ്ധിപ്പിക്കാമെങ്കിലും നടപ്പാക്കുന്നില്ല. ആരോഗ്യ സ്റ്റാൻഡിംഗ് കമ്മിറ്റി തീരുമാനം കൈക്കൊള്ളുന്നുണ്ടെങ്കിലും കൗൺസിൽ അംഗീകരിച്ച് കരാർ പുതുക്കുന്നില്ല. ഇതുമൂലം വൻ തുകയാണ് കുടിശികയെന്നും ഓഡിറ്റ് റിപ്പോർട്ട് വ്യക്തമാക്കുന്നു.
പണം വാങ്ങുന്നതിൽ പിഴവ്
തദ്ദേശസ്ഥാപനങ്ങൾ കോർപ്പറേഷന്റെ അക്കൗണ്ടിലേക്ക് നേരിട്ടാണ് പണം അടയ്ക്കുന്നത്. ചെലാൻ നമ്പറോ മറ്റ് വിവരങ്ങളോ ഏത് കാലയളവിലേക്കാണ് എന്നോ തുടങ്ങിയ കാര്യങ്ങൾ രേഖപ്പെടുത്തുന്നില്ല. അതുമൂലം യഥാസമയം രസീത് നൽകാനോ വരവുവയ്ക്കാനോ കഴിയുന്നില്ല. ഇക്കാര്യങ്ങൾ വ്യക്തമാക്കി പണം അടയ്ക്കാൻ നിർദ്ദേശിക്കണമെന്ന് റിപ്പോർട്ടിൽ പറയുന്നു.
കുടിശിക കണക്ക്
2020 ഏപ്രിൽ മുതൽ 2021 മാർച്ച് വരെ
തദ്ദേശ സ്ഥാപനം, ടൺ. കുടിശിക
തൃപ്പൂണിത്തുറ 961- 14,84,872
കളമശേരി 3633- 53,32,689
അങ്കമാലി 174- 2,56,382
തൃക്കാക്കര 4106- 40,98,573
ആലുവ 1686- 26,02,723
ചേരാനല്ലൂർ പഞ്ചാ. 997- 8,05,826
കുമ്പളങ്ങി 254- 3,70,285
ആകെ 11,811- 1,49,51,350
(ഇക്കാലയളവിൽ ആലുവ നഗരസഭയുടെ 17,69,697 രൂപ ലഭിച്ചതായി കാണുന്നുണ്ടെന്ന് ഓഡിറ്റ് റിപ്പോർട്ടിലുണ്ട്. ശേഷിക്കുന്നതാണ് കുടിശിക)
ബ്രഹ്മപുരത്തെ മറ്റ് തദ്ദേശ സ്ഥാപനങ്ങളുടെ കുടിശിക സംബന്ധിച്ച വ്യക്തമായ കണക്കുകൾ കുറച്ചു ദിവസം കഴിഞ്ഞേ ലഭ്യമാകൂ.
കെ.എ.അൻസിയ, ഫിനാൻസ് കമ്മിറ്റി ചെയർപേഴ്സൺ & ഡെപ്യൂട്ടി മേയർ
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |