സ്ഥിരം നായകൻ എയ്ഡൻ മാർക്രമിന്റെ അഭാവത്തിൽ ഞായറാഴ്ച നടക്കുന്ന ഐ.പി.എല്ലിലെ ആദ്യ മത്സരത്തിൽ സൺറൈസേഴ്സ് ഹൈദരാബാദിനെ ഇന്ത്യൻ പേസർ ഭുവനേശ്വർ കുമാർ നയിക്കും.ദക്ഷിണാഫ്രിക്കൻ താരമായ മാർക്രം നെതർലാൻഡിനെതിരായ രണ്ട് ഏകദിനങ്ങളുടെ പരമ്പര കഴിഞ്ഞ് ഏപ്രിൽ മൂന്നിനേ ഇന്ത്യയിൽ എത്തുകയുള്ളൂ. ഏപ്രിൽ രണ്ടിന് രാജസ്ഥാൻ റോയൽസുമായാണ് സൺറൈസേഴ്സിന്റെ ആദ്യ മത്സരം.

ഭുവനേശ്വർ കഴിഞ്ഞ സീസണുകളിലായി ഏഴ് മത്സരങ്ങളിൽ സൺറൈസേഴ്സിനെ നയിച്ചിരുന്നു. ഇതിൽ രണ്ടെണ്ണത്തിലേ വിജയം നൽകാൻ കഴിഞ്ഞിരുന്നുള്ളൂ. ഇന്നലെ ഐ.പി.എൽ ക്യാപ്ടന്മാരുടെ ഫോട്ടോ ഷൂട്ടിൽ ഭുവനേശ്വറാണ് സൺറൈസേഴ്സിനെ പ്രതിനിധീകരിച്ച് എത്തിയത്.

ഏകദിന ലോകകപ്പിൽ നേരിട്ട് പ്രവേശനം ലഭിക്കാൻ നെതർലാൻഡിനെതിരായ ഏകദിന പരമ്പര വിജയം അനിവാര്യമായതിനാലാണ് ദക്ഷിണാഫ്രിക്ക മാർക്രമിന്റെ ഐ.പി.എല്ലിനായുള്ള വരവ് വൈകിപ്പിച്ചത്.