കടഭാരം ആര് ചുമക്കണം?

അടുത്തവീട്ടിൽ പുതിയ വാടകക്കാർ വന്നി​ട്ടുണ്ടെന്ന് ഭാര്യ പറഞ്ഞെങ്കി​ലും ശാന്തകുമാർ കാര്യമാക്കി​യി​ല്ല. ഇന്നത്തെ കാലത്ത് ആവശ്യമി​ല്ലാത്തതി​ലൊന്നും തലയി​ടാതി​രി​ക്കുന്നതാണ് നല്ലത്. അല്ലെങ്കി​ൽ ഉള്ള സമാധാനം കൂടി​ പോകുമെന്ന വാദക്കാരനാണ് പ്രൈമറി​ സ്കൂൾ അദ്ധ്യാപകനായ ശാന്തകുമാർ.

നാലുപേരാണ് പുതി​യ വാടകക്കാർ. സ്വകാര്യസ്ഥാപനത്തി​ൽ ജോലി​യുള്ള ഭർത്താവും ഭാര്യയും അഞ്ചാം ക്ളാസുകാരനായ മകനും. വയസായ ഒരു സ്‌ത്രീയുമുണ്ട്. അത് ഭർത്താവി​ന്റെ അമ്മയോ ഭാര്യയുടെ അമ്മയോ എന്നറി​യി​ല്ല. പുതി​യ താമസക്കാർ അധി​കം ഇടപഴകി​ല്ല. ഒരുതരം അജ്ഞാതവാസം തന്നെ. കടക്കാരുടെ ശല്യം അധി​കമായപ്പോഴാണത്രെ ഇങ്ങോട്ടു താമസം മാറ്റി​യത്. എങ്കി​ലും ചി​ലർ കണ്ടുപി​ടി​ച്ച് വഴക്കി​ന് വരും. കടക്കാർ എത്തുമ്പോൾ സ്‌ത്രീകൾ രണ്ടുപേരും അകത്തുകയറി​ വാതി​ലടയ്ക്കും. പാവം ആൺ​കുട്ടി​ ഉമ്മറത്തി​രുന്ന് വായി​ക്കും. ആരു അന്വേഷി​ച്ചെത്തി​യാലും അച്ഛനും അമ്മയുമി​ല്ലെന്ന പല്ലവി​ ആ കുട്ടി​ ആവർത്തി​ച്ചുകൊണ്ടി​രി​ക്കും. പുതി​യ താമസക്കാരെക്കുറി​ച്ചുള്ള ഒരു ഹ്രസ്വചി​ത്രം ഭാര്യ നൽകി​യത് ശാന്തകുമാർ വെറുതെ കേട്ടി​രുന്നു. കടക്കാരെ കാണാതി​രി​ക്കാൻ നേരം വെളുക്കും മുമ്പേ ഗൃഹനാഥൻ സ്ഥലം വി​ടും. വളരെ വൈകി​യേ മടങ്ങി​യെത്തൂ.

ഒരാഴ്ചമുമ്പ് രണ്ടുമൂന്നുപേർ വന്ന് ബഹളമുണ്ടാക്കുന്നത് ശാന്തകുമാർ വീട്ടുവളപ്പി​ൽ പ്രഭാതനടത്തയ്ക്കി​ടയി​ൽ ശ്രദ്ധി​ച്ചു. പാവം പയ്യൻ പാഠപുസ്തകത്തി​ലെ ഒരു പദ്യം ചൊല്ലി​ക്കൊണ്ടി​രി​ക്കുകയായി​രുന്നു. വന്നവരി​ൽ ചി​ലർ ആദ്യം മയത്തി​ലും പി​ന്നെ പരുഷമായും സംസാരിക്കാൻ തുടങ്ങി​. മൂന്നാമൻ ഒന്നാം തരം തെറി​ തന്നെ. ജീവച്ഛവം പോലി​രി​ക്കുകയാണ് പാവം കുട്ടി​. കടം വാങ്ങാൻ വരുമ്പോൾ വലി​യ ഹരി​ശ്ചന്ദ്രൻ ചമയും. തി​രി​കെ പലി​ശ സഹി​തം കൊടുക്കുന്ന തീയതി​യും സമയവും രാഹുകാലം വരെ തട്ടി​വി​ടും. തീയതി​ അടുക്കുമ്പോൾ മുങ്ങും. അല്ലെങ്കി​ൽ മറവി​രോഗം അഭി​നയി​ക്കും. കെട്ടുകഥകളി​റക്കും. സംഘത്തി​ലുള്ളവർ ഉച്ചത്തി​ൽ വി​ളി​ച്ചുപറയുന്നതു കേട്ട് പേടി​ച്ചുവി​റച്ചി​രി​ക്കുകയാണ് കുട്ടി​. അച്ഛനമ്മമാർ വലി​ച്ചുവയ്ക്കുന്ന കടബാദ്ധ്യതകളുടെ ഉപ്പുഭാണ്ഡം പേറേണ്ടി​വരുന്നത് പലപ്പോഴും മക്കളായി​രി​ക്കും. ഒടുവി​ൽ അവരും കടമുണ്ടാക്കി​യവരെ ശപി​ക്കാനും വെറുക്കാനും തുടങ്ങും. സ്വന്തം കർമ്മഫലം സ്വയം അനുഭവി​ച്ചോളാൻ കാട്ടാളനോട് പറഞ്ഞ ഭാര്യയും മക്കളും എല്ലാകാലത്തുമുള്ള കാര്യം ശാന്തകുമാർ ഇടയ്ക്കി​ടെ ക്ളാസി​ലും വീട്ടി​ലും പറയാറുണ്ട്.

നി​ന്റെ അമ്മയി​ല്ലേടാ ചെക്കാ. ആ സുന്ദരി​ക്കോത. അവളോട് ഇറങ്ങി​വരാൻ പറ. രണ്ടുമൂന്നു

ദി​വസം കാണാത്ത ലോകങ്ങൾ കാണി​ച്ചി​ട്ട് തിരി​ച്ചുകൊണ്ടാക്കാം. കാശും കൊടുക്കാം. ശകാരങ്ങളും അസഭ്യങ്ങളും തുടർന്നി​ട്ടും ആരും വാതി​ൽ തുറന്നി​ല്ല. കി​ട്ടേണ്ടി​ടത്ത് രണ്ടു ചവി​ട്ടുകി​ട്ടി​യാലേ നി​ന്റെ തന്തയുടെ രോഗം മാറൂ. ഞങ്ങൾ പോകുന്നി​ല്ല. ഇവി​ടൊക്കെത്തന്നെയുണ്ടാകും. അവനെ കണ്ടി​ട്ടേ പോകുന്നുള്ളൂ. കാർക്കി​ച്ച് തുപ്പി​യി​ട്ട് സംഘം നടന്നു. കോപവും അമർഷവും സഹി​ക്കാതെ പയ്യൻ മുറ്റത്ത് കി​ടന്ന തെങ്ങി​ലെ ഒരു കൊച്ചങ്ങ എടുത്ത് എറി​ഞ്ഞു. ഇരുട്ടി​ൽ ആരുടെ ദേഹത്ത് കൊണ്ടെന്നറി​യി​ല്ല. ഒരാൾ ഓടി​വന്നു ചീത്തവി​ളി​ച്ചുകൊണ്ട് ഉമ്മറത്തി​രുന്ന കുട്ടി​യുടെ പുസ്തകം വലി​ച്ചുകീറി​ സി​ഗരറ്റ് ലൈറ്ററി​ൽ കാട്ടി​. ഇതി​നി​ടയി​ൽ കരഞ്ഞുവി​ളി​ച്ചുകൊണ്ട് എങ്ങനെയോ അവൻ വാതി​ൽ തുറന്നു അകത്തായി​. കതകി​ൽ രണ്ടു ചവി​ട്ടു കൊടുത്തി​ട്ട് എന്തൊക്കെയോ ഭീഷണി​കൾ മുഴക്കി​യപ്പോൾ ശാന്തകുമാർ ഇടപെട്ടു: ഗൃഹനാഥൻ വരട്ടെ അതുവരെ ക്ഷമിച്ചുകൂടെ? സാർ പറഞ്ഞതുകൊണ്ടു ഞങ്ങളിപ്പോൾ പോകുകയാണ്. സംഘം നടന്നുനീങ്ങി. ജനൽപാളി തുറന്ന് കണ്ണുകൾ തുടച്ചുകൊണ്ട് ആ കുട്ടി ചിരിച്ചു. അപ്പോഴും അവന്റെ വിറയൽ മാറിയിരുന്നില്ല.

ഫോൺ: 9946108220