മുൾക്കിരീടം ശിരസ്സിൽ ചാർത്തി

മൗനവേദന ഉള്ളിലൊതുക്കി

മൃദുവായ് മൃദുവായ് മന്ദഹസിച്ച്

മരണം കൈവരിച്ച ദേവാ !

തിന്മകൾ നിറയുമീ മണ്ണിൽ

പാപത്തിൻ വിത്തുകൾ മുളയ്ക്കുന്നു ;

മനസ്സുകൊണ്ടെന്നും എത്തുന്നു ഞങ്ങൾ

പുണ്യമാം ജോർദ്ദാൻ നദിക്കരയിൽ.

വാനമേഘങ്ങളിൽ മഴവില്ലുപോലെ

കാണുന്നു നിൻ മഹത്ത്വം നിത്യം.

വയൽപ്പുല്ലിൽ പോലും അലങ്കാരം ചാർത്തും

ആഴിയും ഭൂമിയും തീർത്ത നാഥാ,

അഗ്നിപരീക്ഷകൾ നേരിടും ഞങ്ങൾക്ക്

സഹനത്തിൻ തുഴയെന്നും തന്നീടണേ !

ലോകത്തെ സ്നേഹിച്ച കുറ്റത്താൽ

ബലിയായ് നല്ലവർ മാറുന്നു ;

കാരിരുമ്പാണികളിന്നു കരളിൽ

ക്രൂരമായ് വിധി വീണ്ടും തറയ്ക്കുന്നു.

മെഴുകുതിരി പോലെ ഉരുകുമ്പോഴും

അഭയം നിന്നപദാനം മാത്രം.

അലയാഴി പോലും വരുതിയിലാക്കി

ഉപമകൾ ഉരുവിട്ട ദൈവപുത്രാ,

അനുതാപം ചൊല്ലും അജ്ഞരാം ഞങ്ങൾക്ക്

അമലമാം ജീവജലം നൽകേണമേ !

Mob: 9446786724