തിരുവനന്തപുരം: പ്ളസ് വൺ പ്രവേശനം സംബന്ധിച്ച് വിദ്യാർത്ഥികൾക്കോ രക്ഷാകർത്താക്കൾക്കോ ഒരു ആശങ്കയും വേണ്ടെന്ന് മന്ത്രി വി. ശിവൻകുട്ടി. തന്റെ ഫേസ്ബുക്ക് പേജിലിട്ട കുറിപ്പിലാണ് മന്ത്രി ഇക്കാര്യം അറിയിച്ചത്. പ്ലസ് വൺ പ്രവേശനം സംബന്ധിച്ച് ദുരാരോപണങ്ങൾ പടർത്തുന്ന ഒരു ചെറിയ വിഭാഗം നിക്ഷിപ്ത താല്പര്യക്കാരുണ്ടെന്നും മന്ത്രി കുറിപ്പിലൂടെ അഭിപ്രായപ്പെട്ടു. അവർ കഴിഞ്ഞ തവണയും പ്ലസ് വൺ പ്രവേശന സമയത്ത് ഈ ആരോപണങ്ങൾ ഉന്നയിച്ചിരുന്നു. എന്നിട്ടും ഒരു തടസവുമില്ലാതെ പ്രവേശന നടപടികൾ പൂർത്തിയായി. പ്രവേശനത്തിനുള്ള പ്രോസ്‌പെക്ടസ് തയ്യാറാക്കുന്നതിന് മുമ്പ് തന്നെ ഇത്തരം ആരോപണങ്ങൾ ഉന്നയിച്ച് രംഗത്തെത്തുന്നവർക്ക് നല്ല ഉദ്ദേശമല്ല ഉള്ളത്. കേരള സംസ്ഥാനത്തെ തെക്കും വടക്കും എന്നൊക്കെ പറഞ്ഞ് വിലയിരുത്തുന്നത് തീർത്തും അനാരോഗ്യകരമായ പ്രവണതയാണ്. സംസ്ഥാനം രൂപീകരിച്ച ശേഷം അധികാരത്തിൽ വന്ന ഒരു സർക്കാരും ഇത്തരത്തിലൊരു നിലപാട് കൈക്കൊണ്ടിട്ടില്ലെന്നും മന്ത്രി ഫേസ്ബുക്കിൽ കുറിച്ചു.