മുംബയ്: ജലക്ഷാമം മൂലം ആഴമേറിയ കിണറ്റിൽ കയർ കെട്ടി ഇറങ്ങി വെള്ളം എടുക്കുന്ന സ്ത്രീയുടെ വീഡിയോയാണ് ഇപ്പോൾ ഏറെ ചർച്ചയാകുന്നത്. മഹാരാഷ്ട്രയിലെ നാസികിലെ കോശിമ്പട ഗ്രാമത്തിൽ നിന്നാണ് ഈ ദുരവസ്ഥയുടെ വീഡിയോ പകർത്തിയത്.

കിണറിന്റെ അടിഭാഗത്തുള്ള കുറച്ച് ചെളിവെള്ളം എടുക്കാൻ ഒരു സ്ത്രീ കയറിൽ പിടിച്ച് കിണറ്റിൽ ഇറങ്ങുന്നു. ശേഷം കിണറ്റിന് ചുറ്റുനിൽക്കുന്നവർ അവരുടെ പാത്രങ്ങളും വെള്ളം എടുക്കാൻ കയർ കെട്ടി താഴെ ഇറക്കുന്നു. കിണറ്റിൽ ഇറങ്ങിയ സ്ത്രീ ഈ പാത്രങ്ങളിൽ എല്ലാം ചെളിവെള്ളം ശേഖരിക്കുന്നതാണ് വീഡിയോയിൽ ഉള്ളത്.

എ എൻ ഐയാണ് ഈ ദൃശ്യങ്ങൾ അവരുടെ ട്വിറ്റർ പേജിൽ പങ്കുവച്ചത്. വരൾച്ച ഏറ്റവും കൂടുതൽ ബാധിക്കുന്നത് ഗ്രാമങ്ങളിലാണ്. ഗ്രാമവാസികൾ മണിക്കൂറുകൾ ചെലവഴിച്ചാണ് വലിയ കിണറുകളിൽ നിന്ന് വെള്ളം എടുക്കുന്നത്. ജലക്ഷാമം പരിഹരിക്കാൻ എല്ലാ ഗ്രാമങ്ങളിലും വാട്ടർ കണക്ഷൻ എത്തിക്കാനുള്ള ടെൻഡർ പാസാക്കിയതായി മഹാരാഷ്ട്രയിലെ ആദിവാസി വികസന മന്ത്രി വിജയ്കുമാർ കൃഷ്ണറാവു ഗാവിത് മാദ്ധ്യമങ്ങളോട് പറഞ്ഞു. 2024നകം ജൽ ജീവൻ മിഷന്റെ ഭാഗമായി എല്ലാ ഗ്രാമങ്ങളിലും വെള്ളം എത്തിക്കുമെന്നും അദ്ദേഹം കൂട്ടിച്ചേർത്തു.

#WATCH | Maharashtra: Due to the water crisis, people of Koshimpada Village are compelled to consume; descent into a well to fetch water pic.twitter.com/6orDLsCpyQ

— ANI (@ANI) May 24, 2023