തിരുവനന്തപുരം: സംസ്ഥാനത്ത് സ്വർണത്തിന് ഇ -വേ ബിൽ ഏർപ്പെടുത്തുന്നത് മേഖലയെയും ജനങ്ങളെയും ദോഷകരമായി ബാധിക്കുമെന്ന് ഓൾ കേരള ഗോൾഡ് ആൻഡ് സിൽവർ മർച്ചെന്റസ് അസോസിയേഷൻ (എ.കെ.ജി.എസ്.എം.എ.) ഭാരവാഹികൾ വാർത്താസമ്മേളനത്തിൽ പറഞ്ഞു. ഒരു നികുതിക്ക് മുകളിൽ സംസ്ഥാനങ്ങൾ നിബന്ധന നടപ്പാക്കുന്നത് ജി.എസ്.ടി.യുടെ അന്തഃസത്തയ്ക്ക് വിരുദ്ധമാണ്. പണിയിടത്തിൽ നിന്ന് സ്വർണം കൊണ്ടുപോകാനും ഇ-വേ ബിൽ വേണ്ടിവരുന്നത് തൊഴിലാളിക്ക് നഷ്ടമാണുണ്ടാക്കുക. വ്യാപാരികളെയും നിബന്ധന പ്രതികൂലമായി ബാധിക്കും. സ്വർണ വ്യാപര മേഖലയിലെ പ്രതിസന്ധികൾക്ക് പരിഹാരം കാണണമെന്നാവശ്യപ്പെട്ട് ധനമന്ത്രിക്ക് നിവേദനം നൽകിയെന്നും അസോസിയേഷൻ സംസ്ഥാന പ്രസിഡന്റ് ഡോ. ബി.ഗോവിന്ദൻ, ജനറൽ സെക്രട്ടറി കെ.സുരേന്ദ്രൻ, ട്രഷറർ എസ്.അബ്ദുൽ നാസർ എന്നിവർ പറഞ്ഞു.