നിസാം ബഷീർ സംവിധാനം ചെയ്യുന്ന ദിലീപ് ചിത്രത്തിൽ സുരാജ് വെഞ്ഞാറമൂടും കേന്ദ്രകഥാപാത്രത്തെ അവതരിപ്പിക്കുന്നു . മമ്മൂട്ടി ചിത്രം റോഷാക്കിനു ശേഷം നിസാം ബഷീറും തിരക്കഥാകൃത്ത് സമീർ അബ്ദുള്ളും ഒന്നിക്കുന്ന ചിത്രത്തിന്റെ ചിത്രീകരണം ഉടൻ ആരംഭിക്കാനാണ് തീരുമാനം. രതീഷ് രഘുനന്ദന്റെയും വിനീത് കുമാറിന്റെയും ചിത്രങ്ങൾ പൂർത്തിയാക്കിയശേഷം നിസാം ബഷീറിന്റെ ചിത്രത്തിൽ ദിലീപ് ജോയിൻ ചെയ്യും.തെന്നിന്ത്യൻ താരം ആയിരിക്കും ചിത്രത്തിലെ നായിക എന്നാണ് വിവരം. ബാദുഷ സിനിമാസ്, ആന്റോ ജോസഫ് ഫിലിം കമ്പനി, ഗ്രാന്റ് പ്രൊഡക്‌ഷൻസ്, വണ്ടർഹാൾ സിനിമ എന്നീ ബാനറുകളിൽ ബിഗ് ബഡ്ജറ്റിലാണ് നിർമ്മാണം. ഇടവേളയ്ക്കു ശേഷം ദിലീപും സുരാജ് വെഞ്ഞാറമൂടും ഒരുമിക്കുന്ന ചിത്രത്തിൽ വൻതാരനിര അണിനിരക്കുന്നുണ്ട്.അതേസമയം സുധീഷ് ഗോപിനാഥ് സംവിധാനം ചെയ്ത മദനോത്സവം ആണ് സുരാജ് വെഞ്ഞാറമൂട് നായകനായി അവസാനം തിയേറ്ററിൽ എത്തിയ ചിത്രം. ന്നാ, താൻ കേസ് കൊട് എന്ന ചിത്രത്തിനുശേഷം രതീഷ് ബാലകൃഷ്ണൻ പൊതുവാൾ രചനയും സംവിധാനവും നിർവഹിക്കുന്ന സുരേശന്റെയും സുമലതയുടെയും ഹൃദയഹാരിയായ പ്രണയകഥ എന്ന ചിത്രത്തിൽ സുരാജ് പ്രധാന കഥാപാത്രത്തെ അവതരിപ്പിക്കുന്നുണ്ട്. ആൻഡ്രോയ്ഡ് കുഞ്ഞപ്പനുശേഷം രതീഷ് ബാലകൃഷ്ണൻ പൊതുവാളിന്റെ ചിത്രത്തിൽ സുരാജ് അഭിനയിക്കുന്നു എന്ന പ്രത്യേകതയുണ്ട്.

മദനോത്സവത്തിന് രചന നിർവഹിച്ചതും രതീഷ് ബാലകൃഷ്ണൻ പൊതുവാൾ ആയിരുന്നു.