മലപ്പുറം: നിരോധിത സംഘടനയായ പോപ്പുലർ ഫ്രണ്ടുമായി ബന്ധമുള്ളവരുടെ നിലമ്പൂരിലെയും കൊണ്ടോട്ടിയിലെയും വീടുകളിൽ എൻ ഐ എ റെയ്‌ഡ്. ലോക്കൽ പൊലീസിന്റെ സഹായത്തോടെയാണ് റെഡ്‌ഡ് നടത്തിയത്.

നിലമ്പൂരിൽ ചന്തക്കുന്ന് സ്വദേശി ശരീഫ് എന്നയാളുടെ വീട്ടിലായിരുന്നു പരിശോധന നടന്നത്. ഇവിടെനിന്ന് ചില രേഖകൾ പിടിച്ചെടുത്തു. കാസർകോട് മഞ്ചേശ്വരം കുഞ്ചത്തൂരിലും എൻ ഐ എ പരിശോധന നടത്തി. കുഞ്ചത്തൂരിലെ മുനീറിന്റെ വീട്ടിലാണ് റെയ്‌ഡ് നടന്നത്. പോപ്പുല‌ർ ഫ്രണ്ടിന്റെ കേസുകളുമായി ബന്ധപ്പെട്ട് കേരളത്തിലടക്കം മൂന്ന് സംസ്ഥാനങ്ങളിൽ എൻ ഐ എ റെയ്‌ഡ് നടക്കുകയാണ്. കേരളത്തിനുപുറമേ ബീഹാർ, കർണാടക എന്നിവിടങ്ങളിലാണ് എൻ ഐ എയുടെ പരിശോധന നടക്കുന്നത്.

കുറച്ചുദിവസങ്ങൾക്ക് മുൻപ് തമിഴ്‌നാട്ടിലെ നാല് ജില്ലകളിൽ എൻ ഐ എ റെയ്‌ഡ് നടന്നിരുന്നു. മധുര, ചെന്നൈ, ഡിണ്ടിഗൽ, തേനി ജില്ലകളിലാണ് റെയ്‌ഡ് നടന്നത്. തമിഴ്‌നാട് പൊലീസുമായി ചേർന്ന് പ്രതികളെന്ന് സംശയിക്കുന്നവരുടെ വീടുകളിലും മറ്റുമാണ് എൻ ഐ എയുടെ വിവിധ സംഘങ്ങൾ പരിശോധന നടത്തിയത്.

ജമ്മു കാശ്‌മീരിലെ വിവിധയിടങ്ങളിലും ഇതേസമയം തന്നെ എൻ ഐ എ റെയ്‌ഡ് നടത്തി. പാകിസ്ഥാൻ കമാൻഡർമാരുടെയും ഹാൻഡ്‌ലർമാരുടെയും നിർദ്ദേശപ്രകാരം വ്യാജ പേരുകളിൽ പ്രവർത്തിക്കുന്ന തീവ്രവാദ ഗ്രൂപ്പുകൾ നടത്തിയ ഗൂഢാലോചനയുമായി ബന്ധപ്പെട്ടതാണ് റെയ്‌ഡുകൾ നടന്നത്. ശ്രീനഗർ, അനന്ദ്‌നാഗ്, കുപ്‌വാര, പൂഞ്ച്, രാജൗരി, കിഷ്‌ത്‌വാർ എന്നീ ജില്ലകളിലുൾപ്പെടെയാണ് റെയ്‌ഡ് നടന്നത്.