എടവണ്ണ: പതിനാറുകാരിയെ പീഡിപ്പിക്കാൻ ശ്രമിച്ച കേസിൽ എടക്കര ബാർബർമുക്ക് പുല്ലഞ്ചേരി ഷിജുവിനെ (34) പൊലീസ് അറസ്റ്റ് ചെയ്തു. മുൻ പരിചയത്തിന്റെ പേരിൽ വീട്ടിലെത്തിയ ഇയാൾ അമ്മയോടും പതിനാറുകാരിയായ മകളോടും മോശമായി പെരുമാറിയെന്നാണ് പരാതി. വീട്ടിലെ ദുർമരണങ്ങളും അനിഷ്ട സംഭവങ്ങളും ഒഴിവാക്കാൻ പൂജ നടത്താമെന്ന് പറഞ്ഞാണ് ഇയാൾ വീട്ടിലെത്തിയത്. കഴിഞ്ഞ മാസം 29നാണ് കേസിനാസ്പദമായ സംഭവം നടന്നത്.തുടർന്ന് പെൺകുട്ടി ചൈൽഡ് ലൈൻ അധികൃതർക്ക് പരാതി നൽകി. ഇതിന്റെ അടിസ്ഥാനത്തിൽ അന്വേഷണം നടത്തിയ എടവണ്ണ എസ്‌.ഐ വി.വിജയരാജന്റെ നേതൃത്വത്തിലുള്ള പൊലീസ് ഇയാളെ അറസ്റ്റ് ചെയ്തു. എടവണ്ണ കുന്നുമ്മലിൽ വർഷങ്ങളായി സ്റ്റീൽ വർക്ക് ജോലി ചെയ്തു വരികയാണ് ഷിജു. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.