ഒമർ ലുലു ചിത്രം അഡാർ ലവിലെ കണ്ണിറുക്കൽ സീനിലൂടെ പ്രശസ്തിയിലേക്ക് ഉയർന്നയാളാണ് പ്രിയാ വാര്യർ. വൈറലായ ആ സീനിന് പിന്നിൽ താൻ ആണെന്ന് പ്രിയ അടുത്തിടെ ഒരു അഭിമുഖത്തിൽ പറഞ്ഞിരുന്നു. പേർളി മാണി അവതാരകയായിരുന്ന അഭിമുഖത്തിൽ പ്രിയക്കൊപ്പം നടി മംമ്‌ത മോഹൻദാസുമുണ്ടായിരുന്നു.

''എന്താ ഇപ്പോ ഞാൻ പറയാ...അഞ്ച് വർഷായി'' എന്നുള്ള പ്രിയയുടെ മറുപടി കേട്ട് കണ്ണിറുക്കൽ ഡയറക്‌ടർ പറഞ്ഞിട്ടാണോ പ്രിയയുടെ കൈയിൽ നിന്ന് ഇട്ടതാണോ എന്ന് അവതാരകയായ പേർളി മാണി ചോദിച്ചു. ''ഞാൻ എന്റെ കൈയ്യീന്ന് ഇട്ടതാ'' എന്നായിരുന്നു പ്രിയ വാര്യരുടെ പ്രതികരണം. ''എല്ലാം അങ്ങനെ തന്നെല്ലേ'' എന്നും അഡാർ ലവ് എന്ന ചിത്രത്തിലൂടെ ഒറ്റ രാത്രികൊണ്ട് വൈറലായ നടി കൂട്ടിച്ചേർത്തു.

ഈ അവകാശവാദവും വൈറലായതോടെ കാര്യം നിഷേധിച്ച് ഒമർ ലുലു തന്നെ രംഗത്തെത്തി. മാത്രമല്ല, അഞ്ചു വർഷമായില്ലേ, കുട്ടിക്ക് ഓർമക്കുറവു കാണും. ഇങ്ങനെ ഓർമ നഷ്ടപ്പെടുന്നവർക്ക് വലിയചന്ദനാദി സമർപ്പിക്കുകയാണെന്നും സംവിധായകൻ പരിഹസിച്ചു. കണ്ണിറുക്കൽ ഐഡിയ സംവിധായകന്റേതാണെന്ന് പ്രിയ തന്നെ പറയുന്ന പഴയൊരു വിഡിയോ പങ്കുവെച്ചുകൊണ്ടു കൂടിയായിരുന്നു ഒമറിന്റെ പ്രതികരണം.