കമൽ സംവിധാനം ചെയ്യുന്ന ചിത്രത്തിൽ ഷൈൻ ടോം ചാക്കോ നായകൻ. നമ്മൾ സിനിമയിൽ കമലിന്റെ സംവിധാന സഹായിയായി പ്രവർത്തിച്ചാണ് ഷൈൻ ടോം ചാക്കോ വെള്ളിത്തിരയിലേക്ക് എത്തുന്നത്. കമലിനൊപ്പം നിരവധി ചിത്രങ്ങളിൽ പ്രവർത്തിച്ചിട്ടുണ്ട്. ഇതാദ്യമായാണ് കമലിന്റെ സിനിമയിൽ നായകനാവുന്നത്. കമൽ സംവിധാനം ചെയ്ത ഗദ്ദാമ എന്ന ചിത്രത്തിൽ ബഷീർ എന്ന കഥാപാത്രത്തെ ഷൈൻ അവതരിപ്പിച്ചിരുന്നു. ഷൈൻ നായകനാവുന്ന കമൽ ചിത്രത്തിന്റെ ചിത്രീകരണം ജൂൺ 15 ന് മൂവാറ്റുപുഴയിൽ ആരംഭിക്കും. കുടുംബ പശ്ചാത്തലത്തിൽ ഒരുങ്ങുന്ന ചിത്രം എന്നാണ് വിവരം, കൂടുതൽ വിവരങ്ങൾ അണിയറ പ്രവർത്തകർ ഉടൻ പുറത്തുവിടും. അതേസമയം അഭിനയ ജീവിതത്തിലെ മികച്ച യാത്രയിലാണ് ഷൈൻ. കൊറോണ പേപ്പേഴ്സ്, അടി, നീലവെളിച്ചം, ലൈവ് എന്നീ ചിത്രങ്ങളാണ് ഷൈനിന്റേതായി അടുത്തിടെ റിലീസ് ചെയ്ത സിനിമകൾ.തമിഴിലും തെലുങ്കിലും അരങ്ങേറ്റം കുറിച്ച ഷൈൻ നായകനായി മലയാളത്തിൽ മൂന്നു ചിത്രങ്ങൾ കൂടി ഒരുങ്ങുന്നുണ്ട്. 2019 ൽ പുറത്തിറങ്ങിയ പ്രണയ മീനുകളുടെ കടൽ ആണ് കമലിന്റെ സംവിധാനത്തിൽ അവസാനം പുറത്തിറങ്ങിയ ചിത്രം. കവരത്തിയുടെ പശ്ചാത്തലത്തിൽ പ്രണയകഥയാണ് ചിത്രം പറയുന്നത്.