ഫഹദ് ഫാസിലിനെ നായകനാക്കി ജിതു മാധവൻ രചനയും സംവിധാനവും നിർവഹിക്കുന്ന ആവേശം എന്ന ചിത്രത്തിൽ തെന്നിന്ത്യൻ താരങ്ങളായ മൻസൂർ അലിഖാനും ആശിഷ് വിദ്യാർത്ഥിയും. ബംഗളൂരുവിൽ ഒന്നാം ഘട്ട ചിത്രീകരണം പൂർത്തിയായ ആവേശത്തിന്റെ അടുത്ത ഷെഡ്യൂളിൽ ഇരുവരും ജോയിൻ ചെയ്യും. കാമ്പസ് പശ്ചാത്തലത്തിൽ കോമഡി എന്റർടെയ്നറായി ഒരുങ്ങുന്ന ചിത്രത്തിൽ വേറിട്ട ലുക്കിൽ ആണ് ഫഹദ് ഫാസിൽ എത്തുന്നത്.ചിത്രത്തിൽ നസ്രിയ നായികയായി എത്തുന്നുവെന്നാണ് റിപ്പോർട്ട്. അൻവർ റഷീദ് എന്റർടെയ്‌ൻമെന്റ്സും നസ്രിയയും ചേർന്നു നിർമ്മിക്കുന്ന ചിത്രത്തിന് സമീർ താഹിർ ഛായാഗ്രഹണം നിർവഹിക്കുന്നു. സുശിൻ ശ്യാം ആണ് സംഗീത സംവിധാനം.രോമാഞ്ചം എന്ന ചിത്രത്തിനു ശേഷം ജിതു മാധവൻ സംവിധാനം ചെയ്യുന്ന ചിത്രമാണ് ആവേശം. രോമാഞ്ചത്തിനു സംഗീതം ഒരുക്കിയതും സുശിൻ ശ്യാം ആയിരുന്നു. അതേ സമയം ഇടവേളയ്ക്കു ശേഷം മൻസൂർ അലിഖാൻ മലയാളത്തിൽ അഭിനയിക്കുന്നുവെന്ന പ്രത്യേകതയുണ്ട്. സുരേഷ് ഗോപിയുടെ പൊന്നുച്ചാമി എന്ന ചിത്രത്തിലൂടെ മലയാളത്തിലേക്ക് എത്തിയ മൻസൂർ അലിഖാൻ സുഖം സുഖകരം, ഹൈജാക്ക്, കിണ്ണംകട്ട കള്ളൻ, മാൻ ഒഫ് ദ മാച്ച്, ജനനായകൻ, റെഡ് ഇന്ത്യൻസ്, സത്യം ശിവം സുന്ദരം തുടങ്ങി നിരവധി ചിത്രങ്ങളിൽ മലയാളത്തിൽ അഭിനയിച്ചിട്ടുണ്ട്. വിജയ്‌യുടെ ലോകേഷ് കനകരാജ് ചിത്രം ലിയോയിൽ മൻസൂർ അലിഖാൻ അഭിനയിക്കുന്നുണ്ട്. ബോളിവുഡിലും തെന്നിന്ത്യയിലും മലയാളത്തിലും സജീവമായ ആശിഷ് വിദ്യാർത്ഥി ആവേശത്തിൽ പ്രധാന വേഷത്തിലാണ് എത്തുന്നത്. സി.ഐ.ഡി മൂസ, ചെസ്, ഡാഡി കൂൾ തുടങ്ങിയ ചിത്രങ്ങളിലൂടെ മലയാളത്തിന് ഏറെ പരിചിതനാണ്.