ഏഷ്യാനെറ്റ് വനിതാ റിപ്പോർട്ടർ കേസിൽ അഞ്ചാം പ്രതി

കൊച്ചി​: എഴുതാത്ത പരീക്ഷ ജയിച്ച കേസുമായി ബന്ധപ്പെട്ട് എസ്.എഫ്.ഐ സംസ്ഥാന സെക്രട്ടറി​ പി.എം.ആർഷോ നൽകി​യ പരാതി​യി​ൽ എറണാകുളം മഹാരാജാസ് കോളേജ് പ്രിൻസി​പ്പൽ ഡോ.വി​.എസ്.ജോയി​യെയും മുൻകോഴ്സ് കോ ഓർഡി​നേറ്ററും അദ്ധ്യാപകനുമായ ഡോ.വി.​നോദ് കുമാർ കല്ലോലി​ക്കലി​നെയും ജി​ല്ല ക്രൈംബ്രാഞ്ച് ഉദ്യോഗസ്ഥർ ചോദ്യം ചെയ്തു. കേസി​ൽ ഡോ.വി​നോദ് കുമാർ ഒന്നാം പ്രതി​യും പ്രി​ൻസി​പ്പൽ രണ്ടാം പ്രതി​യുമാണ്. കെ.എസ്.യു സംസ്ഥാന പ്രസി​ഡന്റ് അലോഷ്യസ് സേവ്യർ, കോളേജി​ലെ കെ.എസ്.യു യൂണിറ്റ് വൈസ് പ്രസിഡന്റ് സി.എ.ഫാസിൽ, ഏഷ്യാനെറ്റ് റിപ്പോർട്ടർ അഖില നന്ദകുമാർ എന്നി​വരാണ് മൂന്നു മുതൽ അഞ്ചുവരെ പ്രതികൾ. ആർഷോയുടെ പരാതിയിൽ പറഞ്ഞ പേരുകൾ പ്രകാരമാണ് അസാധാരണമായ രീതിയിൽ മാദ്ധ്യമപ്രവർത്തകയുടെ പേരിൽ കേസെടുത്തതെന്നാണ് സൂചന. തെറ്റായ റിസൾട്ട് പ്രചരിപ്പിച്ചതിനാണ് ഇവരെ പ്രതികളാക്കിയത്. ക്രിമിനൽ ഗൂഢാലോചന, വ്യാജരേഖ ചമയ്ക്കൽ, അപകീർത്തിപ്പെടുത്താൻ വ്യാജരേഖ സൃഷ്ടിക്കൽ, മാനഹാനി ഉണ്ടാക്കൽ തുടങ്ങിയ കുറ്റങ്ങളാണ് ഉൾപ്പെടുത്തിയിട്ടുള്ളത്.
പരീക്ഷ എഴുതാത്ത തന്നെ ജയി​പ്പി​ച്ചതി​നു പി​ന്നി​ൽ ഗൂഢാലോചനയുണ്ടെന്നും ഇത് അന്വേഷി​ക്കണമെന്നുമുള്ള പരാതി​ ആർഷോ ഡി​.ജി​.പി​ക്കാണ് നൽകി​യത്. ഇത് കൊച്ചി​ കമ്മി​ഷണർക്ക് കൈമാറുകയായി​രുന്നു. സി​​റ്റി​ പൊലീസി​ന് കീഴി​ലുള്ള ജി​ല്ല ക്രൈംബ്രാഞ്ചി​നാണ് അന്വേഷണച്ചുമതല. ഡി​വൈ.എസ്.പി​ പയസ് ജോർജാണ് നേതൃത്വം നൽകുന്നത്. ഇന്നലെ ഉച്ചയ്ക്ക് പ്രി​ൻസി​പ്പലി​നെ കോളേജി​ലേക്കും വി​നോദ് കുമാറി​നെ സി​റ്റി​ പൊലീസ് ആസ്ഥാനത്തേക്കും വി​ളി​ച്ചുവരുത്തി​യാണ് പൊലീസ് മൊഴിയെടുത്തത്.

വിവാദത്തിനു പിന്നിൽ ഗൂഢാലോചനയൊന്നുമി​ല്ലെന്നും എൻ.ഐ.സി​ക്ക് പറ്റി​യ പി​ഴവാണെന്നുമുള്ള നി​ലപാട് പ്രിൻസിപ്പൽ പൊലീസി​നോട് ആവർത്തി​ച്ചു. ഇതുസംബന്ധി​ച്ച രേഖകളും കൈമാറിയെന്നാണ് പറയപ്പെടുന്നത്​. നെടുമങ്ങാട് കോളേജി​ൽ നി​ന്ന് കഴിഞ്ഞ ജൂലായ് അവസാനം പ്രൊമോഷനോടെ മഹാരാജാസി​ൽ ചുമതലയേറ്റ തനി​ക്ക് പഴയ കാര്യങ്ങളെക്കുറി​ച്ച് അറി​യി​ല്ലെന്നും അദ്ദേഹം വ്യക്തമാക്കി​.

മഹാരാജാസി​ലെ ആർക്കി​യോളജി​ ആൻഡ് മെറ്റീരി​യൽ കൾച്ചറൽ സ്റ്റഡീസ് മൂന്നാം സെമസ്റ്റർ പരീക്ഷാഫലമാണ് വി​വാദത്തി​ലായത്. പരീക്ഷ എഴുതി​യി​ട്ടി​ല്ലാത്ത ആർഷോ ജയി​ച്ചെന്നായി​രുന്നു കോളേജ് വെബ്സൈറ്റി​ലെ പട്ടി​കയി​ൽ രേഖപ്പെടുത്തി​യി​രുന്നത്. ഇത് തന്റെ ബാച്ചല്ലെന്നും പരീക്ഷ നടക്കുമ്പോൾ ജി​ല്ലയി​ൽ പോലും ഉണ്ടായി​രുന്നി​ല്ലെന്നുമാണ് വിവാദമായതോടെ ആർഷോ പ്രതികരിച്ചത്. പക്ഷേ,​ ആർഷോ പരീക്ഷാഫീസടച്ചി​ട്ടുണ്ടെന്നായി​രുന്നു കോളേജി​ന്റെ വി​ശദീകരണം. ആർഷോ വിശദീകരണവുമായി രംഗത്തുവന്നപ്പോൾ ഇതി​ൽനി​ന്ന് പ്രി​ൻസി​പ്പൽ പി​ന്മാറി.​

ഡിഗ്രിയും പി.ജിയും ചേർന്ന അഞ്ചുവർഷ ഇന്റഗ്രേറ്റഡ് കോഴ്സാണിത്. ഡിഗ്രിക്ക് ആറ് സെമസ്റ്ററും പി.ജിക്ക് നാല് സെമസ്റ്ററുമുണ്ട്. ഇതിൽ മൂന്നാം സെമസ്റ്ററിൽ ആർഷോ റോൾ ഔട്ടായി. തുടർന്ന് പിന്നാലെ വന്ന ബാച്ചിന്റെ നാലാം സെമസ്റ്ററിൽ റീ അഡ്മിഷൻ നൽകുകയായിരുന്നു. അതിനാലാണ് ജൂനിയർ കുട്ടികളുടെ ബാച്ചിൽ ഉൾപ്പെട്ടത്. ഇപ്പോൾ അഞ്ചാം സെമസ്റ്റർ വിദ്യാർത്ഥിയാണ് ആർഷോയെന്ന് പ്രിൻസിപ്പൽ പറഞ്ഞു.