തൊണ്ണൂറ്റി രണ്ടിലും കവിത എഴുത്തിൽ മുഴുകി ഭരതന്നൂർ ശിവരാജൻ
ബാല കവിതകളിൽ വ്യത്യസ്തത തീർത്ത തിരുവനന്തപുരം പരവന്നൂർ പാലോട് സ്വദേശി ഭരതന്നൂർ ശിവരാജൻ തന്റെ തൊണ്ണൂറ്റി രണ്ടാം വയസിലും രചനാ ലോകത്ത് സജീവമാണ്. കവി, ഫ്രീലാൻസ് ജേർണലിസ്റ്റ്, ചാനൽ സംപ്രേക്ഷകൻ, ആകാശവാണി പ്രക്ഷേപകൻ, ഗാനരചയിതാവ് എന്നീ നിലകളിൽ പ്രവർത്തിച്ചിട്ടുള്ള ശിവരാജൻ എഴുപത് വർഷമായി എഴുതുന്നുണ്ട്. അതും കവിതകൾ. ബാലകവിതകളാണ് അദ്ദേഹം കൂടുതലും എഴുതുന്നത്,
ഗ്രാമ പ്രദേശത്ത് ഇടത്തരം കുടുംബത്തിൽ ജനിച്ച ശിവരാജൻ അമ്മ വാമാക്ഷി പാടിയ നാടോടി പാട്ടുകളും നാടൻ പാട്ടുകളും കേട്ടാണ് അക്ഷരങ്ങളെ ഇഷ്ടപ്പെട്ടു തുടങ്ങിയത്. അമ്മയുടെ നാടൻ പാട്ടുകൾ ശ്രദ്ധിക്കാൻ തുടങ്ങിയതു മുതൽ കവിതകളെയും പാട്ടുകളുടെ താളവും ഈണവുമെല്ലാം ഇഷ്ടപ്പെട്ടു തുടങ്ങി. തന്റെ ചെറുപ്പകാലത്താണ് ശിവരാജൻ കവിത എഴുത്തിലേക്ക് കടക്കുന്നത്. പതിന്നാലാം വയസ് മുതൽ കവിതകളെഴുതുമായിരുന്നെങ്കിലും 2000 ലാണ് ആദ്യ കവിതാ സമാഹാരം പ്രസിദ്ധീകരിക്കാൻ കഴിഞ്ഞത്. ഇന്ന് പതിനഞ്ച് കവിതാ പുസ്തകങ്ങൾ പ്രസിദ്ധീകരിച്ചു. ശാകുന്തളം മൂല കഥയെ ആസ്പദമാക്കി ആശ്രമകന്യ എന്ന പേരിൽ 2017 ൽ പ്രസിദ്ധീകരിച്ച കൃതി ഏറെ ആസ്വാദക ശ്രദ്ധ നേടി. ശിവരാജന്റെ ബാലകവിതകൾ സ്കൂൾ ലൈബ്രറികളിലും സ്ഥാനം പിടിച്ചിട്ടുണ്ട്.
കവിതകളെ ലളിതമാക്കണം
ലളിതമായി കുഞ്ഞുകവിതകൾ എഴുതണമെന്നാണ് ശിവരാജന്റെ ആഗ്രഹം.
ചങ്ങമ്പുഴയുടെയും കുഞ്ചൻ നമ്പ്യാരുടെയും വള്ളത്തോളിന്റെയും കവിതകൾ ആസ്വദിച്ചു വായിച്ചിരുന്നു. ഇതിൽ നിന്നെല്ലാമാണ് കവിതകളെ ലളിതമായി എഴുതാൻ ശീലിക്കുന്നത്. ആശാന്റെ കാവ്യ രീതികളും ശിവരാജൻ തന്റെ കവിതകളിൽ പിന്തുടർന്നിട്ടുണ്ട്.
തന്റെ കവിതകൾ വായിക്കുന്നൊരാൾ അർത്ഥം നോക്കാനായി ഒരിക്കലും നിഘണ്ടു മറിക്കേണ്ടി വരരുത്, അതുപോലെ ആദ്യ വരി വായിച്ചാൽ തുടർന്നും ആ വായന മുഴുകും വിധത്തിലാവണം തന്റെ കവിതകളെന്ന നിർബന്ധവും ശിവരാജനുണ്ട്. ഉപദേശക രൂപത്തിലും കുട്ടികളെ രസം കൊള്ളിക്കും വിധത്തിലുമാണ് കവിതകളെ അദ്ദേഹം രൂപപ്പെടുത്തുന്നത്.
ഓർമ്മയിലെ അംഗീകാരം
ഇത്രയും കാലത്തെ എഴുത്ത് പരിചയമുണ്ടെങ്കിലും യാതൊരുവിധ അംഗീകാരവും പ്രശസ്തിയും തേടി വന്നിട്ടില്ല. എന്നാൽ തന്റെ ജീവിതത്തിലെ മറക്കാനാവാത്തൊരു അംഗീകാരം എം. കെ സാനുമാഷിന്റെ കത്തായിരുന്നുവെന്ന് ശിവരാജൻ പറയുന്നു. അതിൽ സാനുമാഷ് പറഞ്ഞത്. കുട്ടികൾക്ക് കുറെ വിസ്മയ കവിതകൾ എന്ന 26 കവിതകളടങ്ങിയ പുസ്തകം ഒറ്റ ഇരുപ്പിന് വായിച്ചു തീർത്തുവെന്നും അതിലെ ഓരോ കവിതകളും കുട്ടികൾക്ക് വളരെയധികം ഉപകാരപ്രദമാണെന്നും പറഞ്ഞു. സാനു മാഷിന്റെ ആ വാക്കുകൾ ഒരു അംഗീകാരമായാണ് ശിവരാജൻ കാണുന്നത്. തൊണ്ണൂറ്റി രണ്ടിലും ഭരതന്നൂർ ശിവരാജൻ 2 പുസ്തകങ്ങൾ പുറത്തിറക്കുന്നതിനുള്ള ഒരുക്കത്തിലാണ്. ബാലകവിതകളിൽ നിന്നും തിരഞ്ഞെടുത്ത 101 കവിതകൾ ആയിരം കാന്താരി പൂത്തിറങ്ങി എന്ന പേരിൽ പുസ്തകമാകും. ശിവരാജൻ കോളേജ് വിദ്യാഭ്യാസത്തിനു ശേഷം ജേർണലിസത്തിൽ ഡിപ്ളോമ എടുത്തു. കെ.എസ്.ആർ.ടി.സിയിൽ ഔദ്യോഗിക ജേർണൽ ട്രാൻസ്പോർട്ട് റിവ്യുവിന്റെ എഡിറ്റർ കം പബ്ളിഷറായി 18 കൊല്ലം പ്രവർത്തിച്ചിരുന്നു. കവിത എഴുത്തിൽ സജീവമാണെങ്കിലും അദ്ദേഹത്തിന് മലയാള സിനിമയിൽ ഗാനങ്ങൾ രചിക്കണമെന്നും ആഗ്രഹവുമുണ്ട്. മക്കളായ ജെ.എസ്. ദേവിക്കും, എസ്. വിനീതയ്ക്കും അവരുടെ കുടുംബത്തിനുമൊപ്പം തിരുവനന്തപുരം കൈമനത്താണ് താമസം.
(ഭരതന്നൂർ ശിവരാജന്റെ
ഫോൺ: 9188501429)
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |