കൊച്ചി: കരുവന്നൂർ ബാങ്ക് തട്ടിപ്പു കേസിൽ ആരോപണം ഉന്നയിച്ചവരെ ക്രൈംബ്രാഞ്ചിനെ ഉപയോ​ഗിച്ച് സി.പി.എം ജില്ലാ സെക്രട്ടറി ഭീഷണിപ്പെടുത്തുന്നുവെന്ന ബാങ്ക് ഡയറക്ടർ ബോർഡിലെ സി.പി.ഐ അംഗത്തിന്റെ വെളിപ്പെടുത്തൽ ഗൗരവമെന്ന് ബി.ജെ.പി സംസ്ഥാന പ്രസിഡന്റ് കെ. സുരേന്ദ്രൻ. വടക്കാഞ്ചേരി ലൈഫ് മിഷൻ തട്ടിപ്പ് കേസിലും ക്രൈംബ്രാഞ്ചിനെ ഉപയോ​ഗിച്ച് കേസ് അട്ടിമറിക്കാൻ സർക്കാർ ശ്രമിച്ചു. കേരളത്തിലെ മറ്റു ബാങ്കുകളിലും സി.പി.എം ഉന്നത നേതാക്കൾക്ക് കള്ളപ്പണ നിക്ഷേപമുണ്ട്. നോട്ട് നിരോധന വേളയിൽ ഇവർ സഹകരണ മേഖലയെ കള്ളപ്പണം വെളുപ്പിക്കാൻ ഉപയോ​ഗിച്ചു. സഹകരണ മേഖലയെ കാർന്നു തിന്നുന്ന ഇടത്-വലത് മുന്നണികളെ തുറന്ന് കാണിക്കുമെന്നും സുരേന്ദ്രൻ പറഞ്ഞു.

പി.എം. വിശ്വകർമ്മ പദ്ധതി

ബഹിഷ്കരണം പ്രതിഷേധാർഹം

പി.എം. വിശ്വകർമ്മ പദ്ധതിയുടെ കേരളത്തിലെ ചടങ്ങുകൾ സംസ്ഥാന സർക്കാർ ബഹിഷ്കരിച്ചത് പ്രതിഷേധാർഹമെന്നും കെ. സുരേന്ദ്രൻ പറഞ്ഞു. പദ്ധതിയുടെ ​ഗുണം ലഭിക്കുന്ന 18 വിഭാ​ഗം തൊഴിലാളികളുള്ള സംസ്ഥാനമാണ് കേരളം. മന്ത്രിമാരോ ജനപ്രതിനിധികളോ കളക്ടറോ പങ്കെടുത്തില്ല. ബഹിഷ്കരണത്തിന്റെ കാരണം വ്യക്തമാക്കണമെന്നും സുരേന്ദ്രൻ ആവശ്യപ്പെട്ടു.