വാഷിംഗ്ടൺ : രാജ്യത്തെ എച്ച് - 1 ബി വിസ സംവിധാനം നിറുത്താൻ ആഗ്രഹിക്കുന്നതായി ടെക് സംരംഭകനും ഇന്ത്യൻ വംശജനുമായ വിവേക് രാമസ്വാമി. അടുത്ത വർഷം നടക്കുന്ന പ്രസിഡന്റ് തിരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ സ്ഥാനാർത്ഥിയെ കണ്ടെത്തുന്നതിനുള്ള ഉൾപ്പാർട്ടി പോരിൽ (പ്രൈമറി) 38കാരനായ വിവേകും മത്സരത്തിനുണ്ട്. എച്ച് -1 ബി വിസയെ കരാർ അടിസ്ഥാനത്തിലുള്ള ഒരുതരം അടിമത്തമായി വിശേഷിപ്പിച്ച വിവേക്, താൻ പ്രസിഡന്റായാൽ എച്ച് - 1 ബി വിസ ലോട്ടറി സമ്പ്രദായത്തിന് പകരം യോഗ്യത അടിസ്ഥാനമാക്കിയുള്ള പ്രവേശനം നടപ്പാക്കുമെന്നും പറഞ്ഞു.

യു.എസ് കമ്പനികൾക്ക് വിദേശ തൊഴിലാളികളെ ജോലിക്കെടുക്കാൻ അനുവാദം നൽകുന്നതാണ് എച്ച്- 1 ബി വിസ. യു.എസിൽ നോൺ ഇമിഗ്രന്റ് വിസയായ എച്ച് - 1 ബിയിൽ എത്തിയവരാണ് ഏറെപ്പേരും. പതിനായിരക്കണക്കിന് തൊഴിലാളികളാണ് യു.എസിലെ ഐ.ടി, ടെക് മേഖലയിലെ കമ്പനികളിൽ ജോലിക്കായി ഇന്ത്യയിൽ നിന്ന് ഈ വിസയിൽ എത്തുന്നത്‌.

വിവേകിന്റെ പ്രസ്താവനയ്ക്കെതിരെ വിമർശനങ്ങളുമുണ്ട്. അതേ സമയം, വിവേക് സ്ഥാപിച്ച ഹെൽത്ത് കെയർ കമ്പനി 2018നും 2023നും ഇടയിൽ ജീവനക്കാരെ നിയമിക്കാൻ 29 തവണ എച്ച് - 1 ബി വിസ പ്രയോജനപ്പെടുത്തിയെന്നാണ് റിപ്പോർട്ട്. ഒഹായോയിലെ സിൻസിനാറ്റിയിൽ ജനിച്ചുവളർന്ന വിവേകിന്റെ മാതാപിതാക്കൾ യു.എസിലേക്ക് കുടിയേറിയ മലയാളികളാണ്.

മുൻ പ്രസിഡന്റ് ഡൊണാൾഡ് ട്രംപ്,​ ഫ്ലോറിഡ ഗവർണർ റോൺ ഡിസാന്റിസ്,​ സൗത്ത് കാരലൈന മുൻ ഗവർണറും യു.എന്നിലെ മുൻ യു.എസ് അംബാസഡറുമായ നിക്കി ഹേലി തുടങ്ങിയവരാണ് റിപ്പബ്ലിക്കൻ പാർട്ടിയുടെ പ്രസിഡന്റ് സ്ഥാനാർത്ഥിയാകാൻ മത്സരിക്കുന്ന മറ്റ് പ്രമുഖർ.