സംസ്ഥാനചലച്ചിത്ര പുരസ്‌കാരവേദികൾ പലപ്പോഴും വിവാദങ്ങളുടെ ഇടമായി മാറാറുണ്ട്. ഇത്തവണയും അക്കാര്യത്തിൽ 'പേരുദോഷ'മുണ്ടായില്ല. അലൻസിയറായിരുന്നു വിവാദനായകൻ. ചലച്ചിത്ര അവാർഡ് തുകയ്‌ക്കൊപ്പം പെൺപ്രതിമ നൽകി പ്രലോഭിപ്പിക്കരുതെന്ന സ്ത്രീ വിരുദ്ധപരാമർശമാണ് അലൻസിയറിൽ നിന്നുണ്ടായത്. അഭിനയത്തിനുള്ള സ്‌പെഷ്യൽ ജൂറി പുരസ്‌കാരം ഏറ്റുവാങ്ങിയ ശേഷം സംസാരിക്കുമ്പോഴായിരുന്നു പരാമർശം.

ഇതിനെതിരെ കടുത്ത വിമർശനം തന്നെ വിവിധ കോണുകളിൽ നിന്നുമുണ്ടായി. അലൻസിയർ പരാമർശം പിൻവലിച്ച് മാപ്പ് പറയണമെന്ന് മന്ത്രിമാരും, സിനിമാ മേഖലയിൽ നിന്നുള്ള സഹപ്രവർത്തകരുമടക്കം പ്രതികരിച്ചു. എന്നാൽ മാപ്പ് പറയാൻ തയ്യാറല്ലെന്നും പറഞ്ഞതിൽ ഉറച്ചു നിൽക്കുന്നുവെന്നുമായിരുന്നു അലൻസിയറിന്റെ പ്രതികരണം.

ദേഷ്യപ്പെടേണ്ടസമയത്ത് ദേഷ്യപ്പെടുകയും കരയേണ്ട സമയത്ത് കരയുകയും ചെയ്യുന്ന ആളാണ് താനെന്ന് അലൻസിയർ പറഞ്ഞു. ''അതാണ് എന്റെ സ്വഭാവം. ഉമ്മ തരേണ്ട നേരത്ത് ഉമ്മ തരികയും ചെയ്യും. അതിപ്പോൾ മഞ്ജു വാര്യർക്ക് ആണെങ്കിലും കൊടുക്കും. അവർ നല്ല സുഹൃത്താണ്. ഉർവശി ചേച്ചിക്ക് ഞാൻ ഉമ്മ കൊടുത്തല്ലോ. ഉള്ളൊഴുക്ക് എന്ന സിനിമ കണ്ടിറങ്ങുമ്പോൾ അവരുടെ പെർഫോമൻസിൽ ഞാൻ ഞെട്ടിപ്പോയി ''- അലൻസിയറുടെ വാക്കുകൾ.