കൊച്ചി: സംസ്ഥാനത്ത് സ്വർണവില തുടർച്ചയായ അഞ്ചാ ദിവസവും കൂടി. ഇന്നലെ ഗ്രാമിന് 15 രൂപയും പവന് 120 രൂപയും വർദ്ധിച്ച് ഗ്രാമിന് 5,520 രൂപയിലും പവന് 44,160 രൂപയിലുമാണ് വ്യാപാരം നടന്നത്. തിങ്കളാഴ്ചയും ഗ്രാമിന് 15 രൂപയും പവന് 120 രൂപയും വർദ്ധിച്ചിരുന്നു. തുടർച്ചയായ ഇടിവുകൾക്കുശേഷം സംസ്ഥാനത്ത് സ്വർണ വില ഉയരുന്ന പ്രവണതയാണ് കാണുന്നത്.

സെപ്റ്റംബർ 13,14 തീയതികളിലാണ് ഈ മാസത്തെ ഏറ്റവും കുറഞ്ഞ വിലയായ ഗ്രാമിന് 5,450 രൂപയും പവന് 43,600 രൂപയും രേഖപ്പെടുത്തിയത്. തുടർന്നുള്ള ദിവസങ്ങളിൽ കുത്തനെ കൂടുകയായിരുന്നു. ‍അഞ്ച് ദിവസംകൊണ്ട് ഗ്രാമിന് 70 രൂപയും പവന് 560 രൂപയും വർദ്ധിച്ചു. സെപ്തംബർ നാലിന് രേഖപ്പെടുത്തിയ പവന് 44,240 രൂപയാണ് മാസത്തിലെ ഏറ്റവും ഉയർന്ന വില. ആഗോളതലത്തിൽ സ്വർണവില ഉയ‌രുന്നതാണ് ഇന്ത്യയിലും പ്രതിഫലിക്കുന്നത്.

18 കാരറ്റ് സ്വർണത്തിന് ഗ്രാമിന് 10 രൂപ ഉയർന്ന് 4568 രൂപയായി. വെള്ളിവിലയിൽ ഇന്നലെ മാറ്റമുണ്ടായില്ല. സാധാരണ വെള്ളിക്ക് ഗ്രാമിന് 78 രൂപയിലും ഹാൾമാർക്ക്ഡ് വെള്ളിക്ക് 103 രൂപയിലുമാണ് ഇപ്പോൾ ഉള്ളത്.