നാട്ടിൻപുറങ്ങളിൽ സുലഭമായി കാണപ്പെടുന്ന ഒന്നാണ് ഇരുമ്പൻ പുളി. എന്നാൽ ഒട്ടുമിക്കവരും ഇതിന്റെ ഗുണങ്ങൾ തിരിച്ചറിയാതെ പോകുന്നുണ്ട്, ഇലുമ്പി പുളി, പുളിഞ്ചിക്ക എന്നീ പേരുകളിൽ ഇരുമ്പൻ പുളി അറിയപ്പെടുന്നുണ്ട്. കാണുമ്പോഴുളള ഭംഗി എങ്ങനെയാണോ അതുപോലെ തന്നെയാണ് ഇരുമ്പൻ പുളിയുടെ പോഷകഗുണങ്ങളും. എന്തൊക്കെയെന്ന് നോക്കാം.

ജീവിതശൈലി രോഗങ്ങളിൽ ഒന്നാമനായി നിലനിൽക്കുന്ന പ്രമേഹത്തെ തുരത്താനുളള എളുപ്പവഴിയാണ് ഇരുമ്പൻ പുളിയുടെ ഉപയോഗം. ശരീരത്തിലെ ഇൻസുലിന്റെ അളവ് ക്രമപ്പെടുത്താൻ ഇരുമ്പൻ പുളി സഹായകമാവും. രക്തത്തിൽ അടങ്ങിയിരിക്കുന്ന ഗ്ലൂക്കോസിന്റെ അളവ് കുറയ്ക്കാൻ ഇത് സഹായിക്കും.

ഉയർന്ന രക്തസമ്മർദ്ദമുളളവർക്ക് ഇരുമ്പൻ പുളി ഗുണം ചെയ്യും.ഇതിലെ ആന്റിഓക്സിഡന്റുകളുടെയും പ്രോട്ടീനുകളുടെയും സാന്നിദ്ധ്യം ശരീരത്തിന് ഗുണം ചെയ്യും. ഇരുമ്പൻ പുളിയുടെ ഗുണമെങ്ങനെയാണോ അതേപോലെ തന്നെ ഇതിന്റെ ഇലകളും ഗുണം നിറഞ്ഞവയാണ്.

ഇതിന്റെ ഇലകൾ ചൂടുവെളളത്തിലിട്ട് തിളപ്പിച്ച് പതിവായി കുടിക്കുകയാണെങ്കിൽ രക്തസമ്മർദ്ദം കുറയ്ക്കാൻ സാധിക്കും. അസ്ഥികളുടെ ബലം വർദ്ധിപ്പിക്കാൻ ഇരുമ്പൻ പുളിയുടെ ഉപയോഗം സഹായം ചെയ്യും.വിറ്റാമിൻ സിയുടെ കലവറയാണ് ഈ ഫലം.ചുമ, ജലദോഷം എന്നിവ തടയാൻ സഹായിക്കുന്നതിനോടൊപ്പം ത്വക്കിലുണ്ടാകുന്ന അലർജികൾ തടയാൻ സഹായിക്കും. ഇരുമ്പൻ പുളിയുപയോഗിച്ച് രുചികരമായ നിരവധി വിഭവങ്ങളും ഉണ്ടാക്കാൻ കഴിയും.