മനുഷ്യരിൽ കാണപ്പെടുന്ന നീലക്കണ്ണുകളെക്കുറിച്ചുളള ചില വെളിപ്പെടുത്തലുകൾ ഇപ്പോൾ ശ്രദ്ധേയമാകുകയാണ്. മനുഷ്യന്റെ ജനിതക ഘടനയിലും ഡി എൻ എയിലും ഉണ്ടാകുന്ന ചിലകാര്യങ്ങളാണ് ഡോക്ടർ നെവിലി സഞ്ജന എക്സിൽ പങ്കുവച്ചിരിക്കുന്നത്. നീലക്കണ്ണുകൾ ഉളള എല്ലാ മനുഷ്യരും ജനിതകമാറ്റം സംഭവിച്ച ഒരു മനുഷ്യന്റെ പിൻഗാമികളാണ് എന്ന ‌ഡോക്ടറുടെ പ്രസ്താവനയിൽ ആശയക്കുഴപ്പത്തിലായ ഒരു ഉപയോക്താവിന്റെ ചോദ്യത്തിന് മറുപടിയായിട്ടാണ് ഡോക്ടർ പ്രതികരിച്ചത്.

ഏകദേശം 6000 മുതൽ 10,000 വർഷങ്ങൾക്ക് മുൻപ് മനുഷ്യന്റെ ഡിഎൻഎയിൽ OCA2 ന്റെ പരിവർത്തനം സംഭവിച്ചതുമൂലമാണ് ഈ പ്രതിഭാസം ആരംഭിച്ചതെന്ന് ‌ഡോക്ടർ സഞ്ചന വ്യക്തമാക്കി. കണ്ണുകളിലെ മെലാനിനാണ് ഈ പ്രതിഭാസത്തിന് കാരണമെന്ന് അവർ പറഞ്ഞു.

എപ്പോഴാണ് പരിവർത്തനം സംഭവിച്ച് തുടങ്ങിയത്

നീലക്കണ്ണുകളുടെ പരിവർത്തനം യൂറോപ്യൻ രാജ്യങ്ങളിലാണ് ആദ്യം സംഭവിച്ചത്. എന്നാൽ കണ്ണുകളുടെ നിറവ്യത്യാസത്തിന് കാരണമാകുന്ന ജീൻ OCA2 അല്ലെന്നും പറയപ്പെടുന്നു. ആളുകളിലെ നീലക്കണ്ണുകൾക്ക് കാരണം ഏകദേശം എട്ടിൽപരം ജീനുകൾ കാരണമാകാമെന്നും കണ്ടെത്തലുകൾ ഉണ്ട്.

നീലക്കണ്ണുകൾ മറ്റുളള കണ്ണുകളിൽ നിന്നും എങ്ങനെ വ്യത്യസ്തപ്പെട്ടിരിക്കുന്നു

നീലക്കണ്ണുകൾ ഉളളവരുടെ എണ്ണം താരതമ്യേന കുറവാണ്. യൂറോപ്യൻ വംശജരിലാണ് ഏറ്റവും കൂടുതൽ നീലക്കണ്ണുകൾ കണ്ടുവരുന്നത്. ലോകജനസംഖ്യയിൽ എട്ട് മുതൽ പത്ത് ശതമാനം വരെയുളളവർക്കാണ് നീലക്കണ്ണുകൾ കാണപ്പെടാറുളളത്. ഇത്തരത്തിൽ കണ്ണുകൾ ഉളളവർക്ക് റെയ്ലി സ്കാറ്ററിംഗ് എന്ന അവസ്ഥ ഉണ്ടാകാൻ സാദ്ധ്യതയേറെയാണ്. തിളങ്ങുന്ന സൂര്യപ്രകാശത്തിൽ അവ നീലനിറത്തിലും മങ്ങിയ വെളിച്ചത്തിൽ ഇവ ചാരനിറത്തിലോ പച്ച നിറത്തിലോ കാണപ്പെടും.