സ്വന്തമായി ഒരു വീടെന്നത് സ്വപ്‌നം കാണാത്തവർ കുറവായിരിക്കും. വീട് പണിയാനുള്ള തറക്കല്ല് ഇടുന്നതുമുതൽ അതിന്റെ പാലുകാച്ചൽ കഴിയുന്നതുവരെ വളരെയധികം കാര്യങ്ങൾ ആലോചിച്ചും തീരുമാനിച്ചുമാകും മിക്കവരും മുന്നോട്ടുപോവുക. അതുപോലെ തന്നെ പ്രധാനമാണ് ഇക്കാര്യത്തിൽ വാസ്‌തുശാസ്‌ത്രത്തിനും. ഏറെ ആഗ്രഹിച്ച് പണികഴിപ്പിച്ച പുതിയ വീട്ടിലേയ്ക്ക് താമസം തുടങ്ങുന്നതിന് മുൻപ് ഒഴിവാക്കേണ്ട ചില കാര്യങ്ങളുണ്ട്.

• പ്രധാന കവാടം വൃത്തിയായും തടസങ്ങളില്ലാതെയും സൂക്ഷിക്കുക.
• വീടിന്റെ പ്രധാന വാതിലിന് നേരെയായി ഗേറ്റ് സ്ഥാപിക്കരുത്. വാസ്തു മണ്ഡലത്തിന്റെ നാല് കോണുകളിലും ഗേറ്റ് നിർമ്മിക്കരുത്. വീടിന്റെ കിഴക്കുഭാഗത്താണ് ഗേറ്റുവയ്ക്കാന്‍ ഉദ്ദേശിക്കുന്നത് എങ്കില്‍, സ്ഥലത്തിന്റെ കിഴക്കേ അതിര് ഒന്‍പത് സമഭാഗങ്ങളായി അളന്നുതിരിച്ച് കുറ്റിയടിക്കുക. ഇതിന്റെ തെക്കുകിഴക്കേ മൂലയില്‍ നിന്ന് പടിഞ്ഞാറോട്ട് നാലാമത്തെ ഭാഗം ഗേറ്റ് വയ്ക്കാനുള്ള ഉത്തമ സ്ഥാനമാണ്.
• ചുറ്റുമതിൽ നിർമ്മിക്കുമ്പോൾ വാസ്തുവിലെ തെക്കു പടിഞ്ഞാറേ ഭാഗം അതായത് കന്നിമൂല പ്രത്യേകം ശ്രദ്ധിക്കണം. ഈ ഭാഗത്ത് മതിലിന്റെ ഉയരം മറ്റുള്ള വശങ്ങളിലെ മതിലിനേക്കാൾ അല്പം കൂടിയിരിക്കണം.
• പുതിയ വീട്ടിൽ പ്രവേശിക്കുന്നതിന് മുൻപ് വീട്ടിലെ ആരാധനായിടം വടക്കു-കിഴക്ക് ദിശയിലല്ലെന്ന് ഉറപ്പാക്കണം.
• വീടിന്റെ തെക്ക്- പടിഞ്ഞാറ് ഭാഗത്ത് മരതൈകൾ നടണം. ഈ ദിശയിലുള്ള വലിയ മരങ്ങൾ സാമ്പത്തികലാഭവും നേട്ടങ്ങളും കൊണ്ടുവരും. ഈ ദിശയിലുള്ള മരങ്ങൾ കുടുംബത്തിലെ ദൗർഭാഗ്യങ്ങൾ ഒഴിവാക്കാൻ സഹായിക്കും.
• വീടിന്റെ തെക്ക്, പടിഞ്ഞാറ്, തെക്ക്-പടിഞ്ഞാറ് ദിക്കുകളിൽ സ്റ്റെയർകേസ് പണിയുന്നതാണ് ഉത്തമം.
• വീട്ടുപേര് കൊടുത്തിരിക്കുന്ന സ്ഥലം തെളിച്ചമുള്ളതാക്കുക.
• നെഗറ്റീവ് ഊർജം ഒഴിവാക്കാൻ വീടിന് മുന്നിൽ പാർക്ക് ചെയ്യുന്ന വാഹനങ്ങൾ എപ്പോഴും വൃത്തിയുള്ളതാണെന്ന് ഉറപ്പാക്കണം.
• വെള്ള, പച്ച, നീല എന്നിവയുടെ വിവിധ ഷേഡുകളാണ് വീടുകൾക്ക് ഏറ്റവും മികച്ചത്. ചുവപ്പിന്റെയും മഞ്ഞയുടെയും ഷേഡുകൾ ഉപേക്ഷിക്കാൻ മടി കാണിക്കരുത്.