ഷക്കീലയുടെ ഡ്രൈവിംഗ് സ്കൂൾ എന്ന സിനിമ അത്ര പെട്ടെന്ന് കേരളത്തിലെ യുവാക്കൾ മറക്കില്ല. ഗോപു, ഷീല എന്നീ കഥാപാത്രങ്ങളെയും. സെക്സ് വിദ്യാഭ്യാസത്തിന്റെ ഭാഗമായി ഡ്രൈവിംഗ് സ്കൂളുമായി തിരിച്ചെത്തി ഷക്കീല. നെറ്റ് ഫ്ലിക്സിലെ ജനപ്രിയ വെബ് സീരീസിന്റെ നാലാം സീസണിന്റെ പ്രൊമോഷന്റെ ഭാഗമായി മൈത്രി അഡ്വർടൈസിംഗ് വർക്സ് തയ്യാറാക്കിയ പ്രൊമോ വീഡിയോയിലാണ് ഷക്കീലയുടെ ഇതുവരെ കാണാത്ത വേഷം. ഡ്രൈവിംഗ് പഠിക്കാൻ എത്തുന്ന രണ്ടു യുവാക്കൾക്ക് ഡ്രൈവിംഗ് പാഠങ്ങൾക്കനുസൃതമായി ലൈംഗിക അറിവു പകർന്നുകൊടുക്കുന്ന കഥാപാത്രമായാണ് ഷക്കീല വീഡിയോയിൽ എത്തുന്നത്. ലൈംഗികതയുമായി ബന്ധപ്പെട്ട തെറ്റായ അറിവുകളെ തിരുത്തുന്ന ഒരു എഡ്യൂക്കേഷണൽ ചിത്രമാണ് ഷക്കീലാസ് ഡ്രൈവിംഗ് സ്കൂൾ. ലൈംഗിക വിദ്യാഭ്യാസത്തെക്കുറിച്ചുള്ള തുറന്ന സംഭാഷണങ്ങളുടെ പ്രാധാന്യവും മുൻവിധികളിൽ നിന്ന് മാറി ചിന്തിക്കേണ്ടതിന്റെ ആവശ്യകതയുമാണ് ഈ പ്രൊമോ ഫിലിം പറയുന്നത്. വീഡിയോ മണിക്കൂറുകൾക്കുള്ളിൽ വൈറലായിട്ടുണ്ട്. ശിവപ്രസാദ് കെ.വിയാണ് സംവിധാനം. നീരജ് രവി ഛായാഗ്രഹണം.