കോഴിക്കോട‌്: കൊടുവള്ളി പെട്രോൾ പമ്പിൽ നടന്ന മോഷണത്തിൽ വൻ ട്വിസ്റ്റ്. പമ്പിലെ ജീവനക്കാരിയുടെ ബാഗിൽ നിന്ന് മോഷ്ടിച്ച മാല മുക്കുപണ്ടമാണെന്ന് കണ്ടെത്തി. ബാഗിലുണ്ടായിരുന്ന സ്വർണമാല യുവതിയുടെ അമ്മ എടുത്തുമാറ്റിയിരുന്നു.

എന്നാൽ ഈ വിവരം യുവതി അറിഞ്ഞിരുന്നില്ലെന്നാണ് റിപ്പോർട്ട്. ഇതിന് പകരം വച്ച മാലയാണ് മോഷ്ടിച്ചത്.

കൊടുവള്ളിയിലെ പെട്രോൾ പമ്പിൽ കവർച്ച നടത്തിയ കേസിൽ പ്രായപൂർത്തിയാകാത്ത രണ്ടുപേരെ പൊലീസ് അറസ്റ്റ് ചെയ്തിരുന്നു. സി സി ടി വി ദൃശ്യങ്ങളിൽ നിന്നാണ് ഇവരെ തിരിച്ചറിഞ്ഞത്. ഇന്നലെ ഉച്ചയ്ക്കായിരുന്നു ഇവർ മോഷണം നടത്തിയത്.

പമ്പിനുള്ളിലെ മുറിയിൽ സൂക്ഷിച്ചിരുന്ന ജീവനക്കാരിയുടെ ബാഗിൽ നിന്ന് മാലയും മൂവായിരം രൂപയുമായിരുന്നു മോഷണം പോയത്. വൈകിട്ട് ജോലികഴിഞ്ഞ് ജീവനക്കാരി വീട്ടിൽപോകാനായി ബാഗ് എടുത്തപ്പോഴാണ് മോഷണം നടന്ന വിവരം അറിയുന്നത്.

ഇതോടെ സി സി ടി വി ദൃശ്യങ്ങൾ പരിശോധിക്കുകയായിരുന്നു. ഹാഫ് പാന്റും ടീ ഷർട്ടും ധരിച്ച ഒരാൾ ആരുടെയും ശ്രദ്ധയിൽപ്പെടാതെ മുറിയ്ക്കകത്തേക്ക് കയറിവരുന്നതും മോഷണം നടത്തിയശേഷം പുറത്തേക്ക് പോകുന്നതും ദൃശ്യങ്ങളിൽ വ്യക്തമായിരുന്നു. തുടർന്ന് നടത്തിയ തിരച്ചിലിയാണ് രണ്ടുപേർ പിടിയിലായത്.