മമ്മൂട്ടി നായകനായി വൈശാഖ് സംവിധാനം ചെയ്യുന്ന ചിത്രത്തിൽ അനശ്വര രാജനും. ഇത് രണ്ടാം തവണയാണ് അനശ്വര രാജൻ മമ്മൂട്ടി ചിത്രത്തിന്റെ ഭാഗമാവുന്നത്. മിഥുൻ മാനുവൽ തോമസ് സംവിധാനം ചെയ്യുന്ന അബ്രഹാം ഓസ്‌ലർ എന്ന ചിത്രത്തിലാണ് മമ്മൂട്ടിയും അനശ്വര രാജനും ആദ്യമായി ഒന്നിച്ചത്. ജയറാം ടൈറ്റിൽ കഥാപാത്രത്തെ അവതരിപ്പിക്കുന്ന അബ്രഹാം ഓസ്‌ലറിൽ മമ്മൂട്ടി അതിഥി വേഷത്തിലാണ് പ്രത്യക്ഷപ്പെടുന്നത്. മമ്മൂട്ടിയും അനശ്വര രാജനും ചേർന്നായിരുന്നു ചിത്രത്തിലെ കോമ്പിനേഷൻ സീൻ. അടിയും പിടിയും നിറഞ്ഞ ജോസ് എന്ന കഥാപാത്രത്തെയാണ് വൈശാഖ് ചിത്രത്തിൽ മമ്മൂട്ടി അവതരിപ്പിക്കുന്നത്. ചിത്രത്തിന് അടിപിടി ജോസ് എന്ന് പേരിടാനാണ് തീരുമാനം. പോക്കിരിരാജ, മധുരരാജ എന്നീ ചിത്രങ്ങൾക്ക് ശേഷം വൈശാഖും മമ്മൂട്ടിയും ഒന്നിക്കുന്ന ചിത്രത്തിന്റെ ചിത്രീകരണം ഒക്ടോബർ 23ന് ആരംഭിക്കും. ബിഗ് ബഡ്ജറ്റിൽ ഒരുങ്ങുന്ന ചിത്രത്തിൽ വൻ താരനിര അണിനിരക്കുന്നുണ്ട്. ആക്ഷൻ പശ്ചാത്തലത്തിൽ ഒരുങ്ങുന്ന മമ്മൂട്ടി - വൈശാഖ് ചിത്രത്തിന്റെ രചന നിർവഹിക്കുന്നത് സംവിധായകനും തിരക്കഥാകൃത്തുമായ മിഥുൻ മാനുവൽ തോമസാണ്. കൊച്ചി, ഇടുക്കി, ചെന്നൈ, കോയമ്പത്തൂർ എന്നിവിടങ്ങളാണ് പ്രധാന ലൊക്കേഷൻ. മമ്മൂട്ടി കമ്പനിയുടെ ബാനറിൽ മമ്മൂട്ടിയാണ് ചിത്രം നിർമ്മിക്കുന്നത്. അതേസമയം കണ്ണൂർ സ്ക്വാഡ് ആണ് റിലീസിനൊരുങ്ങുന്ന മമ്മൂട്ടി ചിത്രം. നവാഗതനായ റോബി വർഗീസ് രാജ് സംവിധാനം ചെയ്യുന്ന കണ്ണൂർ സ്ക്വാഡിൽ പൊലീസ് വേഷമാണ് മമ്മൂട്ടി അവതരിപ്പിക്കുന്നത്. സെപ്തംബർ 28ന് കണ്ണൂർ സ്ക്വാഡ് റിലീസ് ചെയ്യും. ജിയോ ബേബി സംവിധാനം ചെയ്ത കാതൽ ആണ് റിലീസിന് ഒരുങ്ങുന്ന മറ്റൊരു മമ്മൂട്ടി ചിത്രം. രാഹുൽ സദാശിവൻ സംവിധാനം ചെയ്യുന്ന ഭ്രമയുഗത്തിലെ മമ്മൂട്ടിയുടെ രംഗങ്ങൾ പൂർത്തിയായി. പ്രതിനായക വേഷത്തിലാണ് മമ്മൂട്ടി എത്തുന്നത്. ഹൊറർ ത്രില്ലർ ഗണത്തിൽപ്പെട്ട ചിത്രം തമിഴിലെ പ്രശസ്തമായ വൈ നോട്ട് സ്റ്റുഡിയോസ് ആണ് നി‌ർമ്മിക്കുന്നത്.