യാത്ര ചെയ്യാൻ ഇഷ്ടപ്പെടാത്തവരായി ആരും തന്നെയുണ്ടാകണമെന്നില്ല. എന്നാൽ അതൊരു സാഹസിക യാത്രയാണെങ്കിൽ കൗതുകം ഇരട്ടിക്കുമല്ലോ. ലോകത്തിലെ വിവിധ ഭാഗങ്ങളിൽ നിന്നുളള യാത്രാപ്രേമികളെ ഒരു പോലെ ആകർഷിക്കുകയും ഭയപ്പെടുത്തുകയും ചെയ്യുന്ന കെട്ടിടമാണ് 'സാത്തോൺ യുണീക് ടവർ'.

ടൂറിസ്​റ്റുകളുടെ പറുദീസ എന്ന വിളിപ്പേരുളള ബാങ്കോക്കിൽ 26 വർഷമായി ആളില്ലാതെ ഒഴിഞ്ഞ് കിടക്കുന്ന 49 നിലകൾ ഉളള ഒരു കൂ​റ്റൻ കെട്ടിടമാണിത്. എന്തുകൊണ്ടാണ് ഈ പടുകൂ​റ്റൻ കെട്ടിടത്തിന് ഗോസ്​റ്റ് ടവർ എന്ന പേരുകൂടി ലഭിച്ചതെന്ന് നോക്കാം.

ബാങ്കോക്കിന്റെ സംസ്‌കാരത്തെയും ജനജീവിതത്തെയും പ്രതിനിധീകരിക്കേണ്ട ഈ അംബരചുംബി ഇപ്പോൾ നാശത്തിന്റെ വക്കിലാണ്. എന്നാലും സാഹസികർ കെട്ടിടത്തിൽ കയറി നിരവധി വീഡിയോകൾ എടുത്ത് സോഷ്യൽ മീഡിയയിൽ പോസ്​റ്റ് ചെയ്യാറുണ്ട്. 1990ൽ പ്രസിദ്ധ തായ്ലാൻഡ് ആർക്കിടെക്ടായ രംഗ്സൻ ടോർസുവനാണ് ഈ കെട്ടിടത്തിന്റെ ആശയം കൊണ്ടുവന്നത്. ബാങ്കോക്കിലെ 'ഉന്നതർക്കായുളള ആഡംബര ഭവനം' എന്ന സ്വപ്നമായിരുന്നു അദ്ദേഹം ഈ ആശയത്തിലൂടെ മുന്നിൽ കണ്ടിരുന്നത്.അങ്ങനെയാണ് കെട്ടിടത്തിന്റെ പണിതത്.

The Sathorn Unique Tower, once a place of luxury and prestige, became scorned by a scandal in 1993 that sent shockwaves across the political landscape of Thailand.

🗺️ #MysteriesOfTheAbandoned
🗓️ 9p ET on Science Channel pic.twitter.com/MUx5tzOZs5

— Science Channel (@ScienceChannel) April 19, 2022

എന്നാൽ സാഹചര്യങ്ങൾ ടോർസുവാന്റെ സ്വപ്നങ്ങൾ തകർക്കുകയായിരുന്നു.1993 ൽ അന്നത്തെ സുപ്രീംകോടതി ചീഫ് ജസ്​റ്റിസിനെ വധിക്കാൻ പദ്ധതിയിട്ടു എന്ന സംശയത്തെ തുടർന്ന് പൊലീസ് അദ്ദേഹത്തെ ഇരുമ്പഴിക്കുളളിലാക്കി. 2008ൽ അദ്ദേഹം കു​റ്റക്കാരനാണെന്ന് കോടതി പ്രഖ്യാപിക്കുകയുണ്ടായി. ഇത് രാജ്യത്ത് കടുത്ത പ്രതിഷേധത്തിനിടയാക്കിയിരുന്നു.

രാജ്യത്തെ സാമ്പത്തിക പ്രതിസന്ധി ഈ ബഹുനില കെട്ടിടത്തെയും സാരമായി ബാധിച്ചു. എൺപത് ശതമാനത്തോളം പണികഴിപ്പിച്ച കെട്ടിടം എങ്ങുമെത്താതെ പോകുകയായിരുന്നു. പൂർത്തീകരിക്കാത്ത കെട്ടിടത്തിൽ പ്രേതബാധയുണ്ട് എന്ന ചില കിംവദന്തികൾ സാത്തോൺ ടവറിനെ ബാധിക്കുകയും ചെയ്തു.

2014ൽ ഡിസംബറിൽ കെട്ടിടത്തിന്റെ 43 -ാം നിലയിൽ സ്വീഡിഷ് വംശജനെ തൂങ്ങിമരിച്ച നിലയിൽ കണ്ടെത്തിയിരുന്നു. ഇതോടെ ജനങ്ങളുടെ ഭീതി കൂടി.സൂര്യോദയം ക്യാമറയിൽ പകർത്താനായി കെട്ടിടത്തിൽ കടന്ന ഫോട്ടോഗ്രഫർക്കാണ് ദാരുണാന്ത്യം സംഭവിച്ചത്. കാലം കടന്നുപോകും തോറും ടവറിനെപ്പ​റ്റിയുളള ഭീതി ജനിപ്പിക്കുന്ന കഥകൾ പരക്കാൻ തുടങ്ങി. 2017 ൽ പുറത്തിറങ്ങിയ ഹൊറർ ചിത്രം ""ദ പ്രോമിസ്"" ഇവിടെയാണ് ചിത്രീകരിച്ചത്.