ഹൈദരാബാദ്: ഡോക്ടറോ എൻജിനീയറോ അല്ല,ഐ ടി പ്രൊഫഷണൽ അല്ലേ അല്ല. പക്ഷേ ഈ യുവതിയുടെ ശമ്പളം കേട്ടാൽ നിങ്ങൾ ഞെട്ടും. 10.05 ലക്ഷം രൂപ. ബി ബി എ വിദ്യാർത്ഥിനിയായ മലിസ ഫെർണാണ്ടസാണ് ഇത്ര കനത്ത ശമ്പളം വാങ്ങുന്നത്. ആക്സിസ് ബാങ്കിന്റെ ഡെപ്യൂട്ടി മാനേജർ ആയി നിയമിതയായതോടെയാണ് ഒരു വിദ്യാർത്ഥിനിക്ക് സ്വപ്നം കാണാൻ പോലും കഴിയാത്ത ശമ്പളം മലിസയ്ക്ക് ലഭിച്ചുതുടങ്ങിയത്. ഹൈദരാബാദിലെ എൻഎംഐഎംഎസ് വിദ്യാർത്ഥിനിയാണ് മലിസ.

വിവരം പുറത്തു വന്നതോടെ മലിസയ്ക്ക് അഭിനന്ദന പ്രവാഹമാണ്. എൻഎംഐഎംഎസ് ഹൈദരാബാദ് ഡയറക്ടർ ഡോ. സിദ്ധാർത്ഥ ഘോഷും അഭിനന്ദനം അറിയിച്ചവരിൽ ഉൾപ്പെടുന്നു. 'വെല്ലുവിളികൾ സ്വീകരിക്കാനും നിർഭയമായി ലോകത്തെ നവീകരിക്കാനും അർത്ഥപൂർണമായ സംഭാവനകൾ സമൂഹത്തിന് നൽകാനുമാണ് ഞങ്ങൾ വിദ്യാർത്ഥികളെ പ്രാപ്തരാക്കുന്നത്' എന്ന് അദ്ദേഹം പറഞ്ഞു.

അടുത്തിടെ ഉത്തർപ്രദേശുകാരിയും ബി ടെക് വിദ്യാർത്ഥിനിയുമായ സൃജൻ അഗർവാളിന് മൈക്രോസോഫ്​റ്റിന്റെ വമ്പൻ ഓഫർ ലഭിച്ചിരുന്നു. 50 ലക്ഷം രൂപയാണ് യുവതിക്ക് ലഭിക്കുന്ന ശമ്പളം. കാൺപൂരിലെ ഡോ.അംബേദ്കർ ഇൻസ്റ്റിറ്റ്യൂട്ട് ഓഫ് ടെക്‌നോളജി ഫോർ ഹാൻഡി ക്യാപ്പ്ഡിലെ വിദ്യാർത്ഥിനിയാണ് സ‌ൃജൻ അഗർവാൾ.