ബംഗളൂരു: കർണാടകയിൽ പുതിയ വിവാദത്തിന് തിരികൊളുത്തി ബിജെപി എംഎൽഎ ബസൻഗൗഡ പാട്ടീൽ യത്നൽ. ജവഹർലാൽ നെഹ്‌റു ഇന്ത്യയുടെ ആദ്യ പ്രധാനമന്ത്രിയല്ല. ബ്രിട്ടീഷുകാർ ഇന്ത്യ വിടാൻ കാരണം സുഭാഷ് ചന്ദ്രബോസാണെന്നും ബസൻഗൗഡ പറഞ്ഞു. ഒരു പൊതു പരിപാടിയിൽ സംസാരിക്കവെയായിരുന്നു എംഎൽഎയുടെ വിവാദ പരാമർശം.

'നെഹ്‌റുവായിരുന്നില്ല ഇന്ത്യയുടെ ആദ്യ പ്രധാനമന്ത്രി. സുഭാഷ് ചന്ദ്രബോസായിരുന്നു. നിരാഹാര സമരം കൊണ്ടും, ഒരു കരണത്തടിച്ചാൽ മറുകരണം കാണിച്ചുകൊടുക്കാൻ പറഞ്ഞതുകൊണ്ടുമല്ല നമുക്ക് സ്വാതന്ത്ര്യം ലഭിച്ചത്. മറിച്ച് നേതാജി സുഭാഷ് ചന്ദ്രബോസ് ജനിപ്പിച്ച ഭയമാണ് സ്വാതന്ത്യം ലഭിക്കാൻ കാരണമായതെന്ന് ബാബാസാഹെബ് ഒരു പുസ്തകത്തിൽ പറഞ്ഞിട്ടുണ്ട്. രണ്ടാം ലോക മഹായുദ്ധത്തിന് ശേഷം ബ്രിട്ടീഷുകാർ ഇന്ത്യ വിട്ടു. ഏതാനും ഭാഗങ്ങളിൽ സ്വാതന്ത്ര്യം പ്രഖ്യാപിച്ചപ്പോൾ സുഭാഷ് ചന്ദ്രബോസായിരുന്നു സ്വതന്ത്ര ഇന്ത്യയുടെ ആദ്യ പ്രധാനമന്ത്രി. അവർക്ക് സ്വന്തമായി കറൻസിയും പതാകയും ദേശീയ ഗാനവും ഉണ്ടായിരുന്നു. അതുകൊണ്ടാണ് ഇന്ത്യയുടെ ആദ്യ പ്രധാനമന്ത്രി സുഭാഷ് ചന്ദ്രബോസാണെന്ന് പ്രധാനമന്ത്രി മോദി പറയുന്നത്.' - ബസൻഗൗഡ പാട്ടീൽ യത്നൽ പറഞ്ഞു.